SQO dárigerleri KVI juqtyrǵan jas ana men sábıiniń ómiri úshin kúresip jatyr
SQO perınataldyq ortalyq dırektory Elena Kalıýjnaıa júkti kelinshekterge vaktsınatsııadan ótýge keńes beredi.
Óıtkeni júktilik kezinde áıelderde ımmýnıtet tómendeıdi, olarda kez-kelgen juqpaly nemese vırýstyq aýrý aýyr túrde ótedi.
Al bul qursaqtaǵy sharanaǵa áser etedi, sý azaıyp, ottegi jetispeýshiligi týyndaıdy, uryqtyń ósýi baıaýlaıdy, tipti ólip ketýi múmkin.
«Bıylǵy 10 aıda óńirde 650-den astam júkti áıel koronavırýs juqtyrdy, 203 kelinshekte aýrý asqynyp, eki jaqty pnevmonııaǵa ulasty. 51 naýqas ókpeni jasandy jeldetý apparatynda jatty. 8 júkti áıeldiń jaǵdaıy óte aýyr boldy, bireýiniń ókpesi 90 %-ǵa deıin zaqymdanyp, tek EKMO apparattyq emdeýdiń arqasynda aman qaldy. Bir bosanǵan áıel, ókinishke oraı, qaıtys boldy. KVI bar analardy kesir tiligi arqyly bosandyrýǵa májbúr boldyq, merziminen óte erte týǵandyqtan úsh sábı qaıtys boldy», - deıdi Elena Kalıýjnaıa.
Qazirgi ýaqytta oblysta qaýipti ınfektsııa juqtyrǵan 18 júkti áıel statsıonarlyq kómek alyp jatyr.
Solardyń bireýi – úshinshi sábıine bosanǵan 35 jastaǵy kelinshektiń jaǵdaıy óte aýyr. Ókpeni jasandy jeldetý apparatyna qosylǵan.
«Naýqas ózdiginen dem ala almaıdy. Óte shuǵyl ota arqyly bosandyryp aldyq. Sábı durys jetilmegen, perınataldyq ortalyqtyń balalar reanımatsııasynda aýyr halde jatyr. Barlyq júkti áıelder júktilik bastalǵanǵa deıin jáne júktilik kezinde KVI-ge qarsy egilmegen», - deıdi ortalyqtyń dırektory.
Dárigerdiń aıtýynsha, Pfizer vaktsınasy júkti áıelderge qaýipsiz. Júktiliktiń 16 aptasynan bastap 36 aptasyna deıingi aralyqta ekpe alýǵa bolady.
Ol úshin óz emhanasyndaǵy egý kabınetine barýy tıis.
«Ózińizdi jáne balańyzdy qaýipti vırýstyq ınfektsııanyń asqynýynan qorǵańyz. Vaktsına erikti túrde qoıylady, tańdaý jasaıtyn ózińiz. Al perınataldyq ortalyqtyń akýsher-gınekolog, reanımatolog, neonatolog dárigerleri sizderge ekpe alýǵa keńes beredi», - deıdi Elena Kalıýjnaıa.
