SQO: Dárigerler aıaldamada zardap shekkenderdiń jaǵdaıy týraly aıtty
PETROPAVL. QazAqparat - Petropavldyń úshinshi qalalyq aýrýhanasynda jeńil kóliktiń avtobýs aıaldamasyna soǵylýynan zardap shekken eki adam jatyr, dep habarlaıdy QazAqparat tilshisi.
Dárigerler egde jastaǵy er adam men jas áıeldiń jaǵdaıyn turaqty, ortasha aýyr dep baǵalaýda. Zardap shegýshiler esterin biledi, erkin sóılesýde.
«Áıeldiń denesinde kóptegen kesilgen jaraqattar boldy. Er adamnyń aıaq-qoly, san súıegi synǵan. Onyń jalpy jaǵdaıy men qosymsha jasalatyn sýretterge (rentgen) qarap, ota jasaý máselesi sheshiledi. Ázirge eshqandaı qajettilik joq», - dedi travmatolog Evgenıı Nıkonov.
Zardap shegýshiler aýrýhanada kem degende 10-12 kún bolady.
Sondaı-aq oblystyq balalar aýrýhanasynda úlken jilinshik súıegi synǵan 8 jasar bala jatyr.
Eske salaıyq, jeksenbi kúni avtomobıl avtobýs aıaldamasyna soǵylǵan bolatyn. 6 adam, sonyń ishinde úsh bala zardap shekti.
