SQO dáriger tapshylyǵyn sheshý úshin Reseıden maman tartpaq
SQO-nyń medıtsına salasyndaǵy kadr tapshylyǵy búgin oblys ákimdiginde qaraldy. Qazirgi ýaqytta óńirge 208 dáriger men 209 feldsher qajet. Suranysqa asa ıe mamandardyń qatarynda psıhıatr, gınekolog, hırýrg, kardıolog, anestezıologtar bar.
SQO ákimi Aıdarbek Saparovtyń pikirinshe, óńirge kelgen mamandarǵa barynsha jaǵdaı jasaý mańyzdy. Aýyldyq jerlerde olardy ortalyqtandyrylǵan jylý jáne sý jelisine qosylǵan baspanamen qamtý kerek.
«Máseleni sheshý úshin medıtsına qyzmetkerlerin elimizdiń basqa aımaqtarynan ǵana emes, Reseıdiń kórshi oblystarynan da tartý kerek. Nege biz Túmen men Ombynyń joǵary oqý oryndaryna baryp, túlektermen kezdespeımiz. Bizdiń usynysymyz kóńilderinen shyǵar. Olardaǵy qazirgi jaǵdaıǵa baılanysty bizdiń oblysqa kelip jumys istegisi keletinder tabylar. Al kelgen mamandarǵa kótermeaqyny arttyrýdy oblystyq máslıhat depýtattarymen aqyldasý kerek. Keı emdeý mekemelerinde jańa qondyrǵylar bar. Alaıda onymen jumys isteıtin maman joq», - dedi Aıdarbek Saparov.
Densaýlyq saqtaý basqarmasy basshysynyń aıtýynsha, óńirge mamandardy tartý úshin olardy turǵyn úımen qamtamasyz etý ázirge nátıje bermegen.
«Byltyr oblysqa 280 dáriger keldi. Olardyń 185-i qalada, 95-i aýyldarda jumys istep jatyr. Kelgenderdiń 132-si jas maman. Biraq ótken jyly óńirden 218 maman ketti, olardyń 140-y – Petropavl qalasynan, 78-i – aýyldardan. Jumystan shyǵyp ketkenderdiń 41-i – jas maman. Dárigerlerdiń jumystan ketýiniń sebebi kóp – basqa jaqqa kóshý, zeınetkerlik jasqa jetý jáne mamandardyń jeke sektorǵa aýysýy. Qazirgi ýaqytta zeınet jasyna jetken medıtsına qyzmetkerleriniń úlesi 11% quraıdy», - deıdi SQO densaýlyq saqtaý basqarmasynyń basshysy Qumar Kúsemisov.
Qazir SQO-ǵa kelgen dárigerlerge aýylǵa barsa 2,5 mln teńge, Petropavlda qalsa 1,5 mln teńge kótermeaqy beriledi. Budan basqa ár emdeý uıymy 1 mln teńgeden bólip, páterdi jaldaý aqysyn tóleıdi. Ári «Dıplommen aýylǵa» sııaqty memlekettik baǵdarlamalarǵa qatysý múmkindigi bar.
