SQO dárigerleri júrekke joǵary tehnologııalyq ota jasaı bastady

ASTANA. KAZINFORM – Soltústik Qazaqstan oblysynda Aýyldyq densaýlyq saqtaýdy jańǵyrtý ulttyq jobasy aıasynda 46 medıtsınalyq nysan salý josparlanǵan. Bul týraly óńir ákimi Ǵaýez Nurmuhambetov aıtyp berdi.

Ákimniń aıtýynsha, byltyr 8 nysan ashylǵan edi. Bıyl 38 mekemeniń qurylysy aıaqtalýǵa jaqyn. Jas Órken jáne Bereke shaǵyn aýdandarynda eki emhana ashyldy. Jyl sońyna deıin Kishkenekól aýylynda jańa emhana iske qosylady.

− Sanıtarlyq avtokólikter jańartylyp, bıyl 7 tehnıka alyndy. Qondyrǵylardy jańartýǵa 5 mıllıard teńge bólindi. Aýrýhanalarǵa ÝZI, tsıfrly rentgen, IVL, mammograf jáne taǵy basqa apparattar ornatyldy. Kardıortalyq pen qalalyq aýrýhanaǵa zamanaýı angıograftar qoıyldy. Endi kardıohırýrgtar júrekke joǵary tehnologııalyq otalar jasaýda, − dedi Ǵ.Nurmuhambetov Astanada Ortalyq kommýnıkatsııalar qyzmetinde.

Sonymen birge, Petropavlda balalarǵa arnalǵan ońaltý ortalyǵy ashyldy. Onda 3 jasqa deıin balalar ár túrli patologııa boıynsha ońaltýdan ótedi.

«Oblysta telemedıtsına boıynsha pılottyq joba júzege asty. Frantsııalyq kompanııamen seriktestik aıasynda «Lımstar» atty 16 telemedıtsınalyq keshen qoıyldy. Medıtsınalyq apparattardyń kómegimen shalǵaı aýyldarda turatyn adamdarǵa keńes berilip, dıagnoz qoıylady», - dep tolyqtyrdy óńir basshysy.

Buǵan deıin Soltústik Qazaqstan oblysynyń ákimi kóktemgi sý tasqyny saldary qalaı qalpyna keltirilgenin aıtyp bergen edi.

Sondaı-aq, Petropavl qalasynyń ataýyn ózgertý kún tártibinde turǵan joq.