SQO-da 150-ge jýyq dárigerdiń orny bos tur

PETROPAVL. KAZINFORM — Soltústik Qazaqstan oblysynda dáriger tapshy. Bıyl óńir jumysqa 131 mamandy alǵanymen, qazir taǵy 144 dárigerdiń orny bos tur.

SQO qoǵamdyq keńeste óńirde dáriger jetispeýshiligi máselesi kóterildi. Densaýlyq saqtaý basqarmasynyń basshysy Qanysh Bıjanovtyń aıtýynsha, qazir óńirde 1 444 dáriger bar. Onyń 52-si zeınetkerlik jasqa jetse, 141 qazirdiń ózinde zeınetker.

Jetispeıtin 144 dárigerdiń teń jartysy aýdandyq aýrýhanalarǵa qajet. 

«Oblystyq máslıhattyń sheshimine sáıkes óńirge kelgen mamandarǵa 1 mln-nan 5 mln teńgege deıin kótermeaqy beriledi. Petropavlǵa jumysqa jiberilgen jalpy praktıka dárigerine 1 mln teńge mólsherinde, al beıindi mamandarǵa 3,5 teńge mólsherinde, aýyldyq jerlerge jáne kentterge, aýdandyq mańyzy bar qalalarǵa jumys isteýge jiberilgen jalpy praktıka dárigerlerine 1,5 mln teńge, sol sııaqty aýylǵa barǵan beıindi mamandarǵa 5 mln teńge kótermeaqy qarastyrylǵan. Bıyl jyl basynan beri 52 dárigerge 181 mln teńge tólendi», — deıdi Qanysh Bıjanov.

Byltyr jumys isteýge kelgen 128 dáriger jalpy somasy 335 mln teńge járdemaqy alǵan.

«Petropavldaǵy «Dáriger úıinde» bos turǵyn páter bolǵan jaǵdaıda jas maman baspanamen qamtamasyz etiledi, aýdandarda jergilikti atqarýshy organdar qyzmettik turǵyn úı beredi. Sondaı-aq, maman páterdi jalǵa alǵan jaǵdaıda 3 jyl boıy qosymsha aqy tóleý qarastyrylǵan. Qazirgi ýaqytta oblys ákimdigine asa tapshy mamandyqtardyń tizimin bekitýge joba joldandy, ol boıynsha kelgen ár mamanǵa 8,5 mln teńge mólsherinde áleýmettik qoldaý kórsetý kózdelgen», — deıdi basqarma basshysy.

Mamannyń aıtýynsha, bıyl jergilikti bıýdjet qarajaty esebinen rezıdentýrada oqýǵa 50 grant bólindi. Qazirgi ýaqytta sharttar jasalyp, 34 rezıdent bilim alyp jatyr. Jyl basynan beri oblysqa 21 rezıdent dáriger keldi. 

Buǵan deıin Petropavldaǵy 2-JEO kásipornynda 200 mamannyń orny bos turǵanyn jazǵan edik.