SQO-dan jylqy aıdap ketken Aqmola oblysynyń úsh turǵyny ustaldy
PETROPAVL. QazAqparat – Soltústik Qazaqstan oblysynda birneshe ret jylqy urlaǵan úsh er adam ustalyp, ýaqytsha ustaý ızolıatoryna qamaýǵa alyndy, dep habarlaıdy QazAqparat tilshisi.
SQO poıtsııa departamenti baspasóz qyzmetiniń málimetinshe, Aıyrtaý aýdanynda jylqynyń joǵalǵandyǵy jóninde turǵyndardyń alǵashqy aryzdary shilde aıynda túsken. Ol joly Gýsakovka eldimekeninde jergilikti JShS-niń eki jylqysy qoldy boldy. Sol túni Imantaý aýylynda turǵynnyń óriste júrgen qulyndy bıesi joǵalǵan.
Qylmyskerler ustatpaı ketkenimen, tártip saqshylary kúdiktilerdi izdeýdi toqtatpaǵan. Osyndaı jedel-tergeý is-sharalary barysynda Aqmola oblysynyń 33, 34 jáne 43 jastaǵy úsh turǵyny anyqtaldy. Bul derek Sotqa deıingi tergep-tekserýdiń biryńǵaı tizilimine «Mal urlyǵy» baby boıynsha engizildi. Kúdiktilerdiń ekeýi ýaqytsha ustaý ızolıatoryna qamalsa, úshinshisine mindetti túrde kelý bultartpaý sharasy qoldanyldy.
Tergeý barysynda olardyń Gýsakovka eldimekeninde byltyr bolǵan taǵy bir jylqy urlyǵyna qatystylyǵy anyqtaldy.
«Kúdiktilerdiń aıtýynsha, olar urlanǵan jylqyny kózge túspeý úshin túnde aıdaǵan. Keıin soıyp, etin Aqmola oblysynda satqan. Olardyń úsheýi de buryn mal urlyǵy úshin sotty bolǵan. Al urylardyń kózine túsken jylqylardyń barlyǵy qaraýsyz, óz betterimen júrgen. Áli kúnge deıin aýyl turǵyndarynyń keıbiri jylqysyn ottasyn dep aýyl syrtyna shyǵaryp, shiderlep qoıady. Urlap ketedi dep qaýiptenbeıdi de. Bul durys emes, baǵýsyz júrgen mal urylarǵa ońaı olja», - deıdi Aıyrtaý aýdandyq polıtsııa bólimi bastyǵynyń orynbasary Grıgorıı Lýkıanenko.
Jalpy «Mal urlyǵy» baby boıynsha 7 jyldan 12 jylǵa deıin bas bostandyǵynan aıyrý jazasy qarastyrylǵan.
