SQO-dan jyl saıyn 5-6 myń adam ketip jatyr –Qumar Aqsaqalov

NUR-SULTAN. QazAqparat – Soltústik Qazaqstannan jyl saıyn 5-6 myń adam qonys aýdarady. Onyń kóbi Reseıge kóshýde. Bul týraly Soltústik Qazaqstan oblysynyń ákimi Qumar Aqsaqalov Ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«Kóshi-qon baǵdarlamasy biz úshin óte mańyzdy. Shyn máninde oblys turǵyndarynyń sany 5-6 myń adam kóleminde azaıyp jatyr. Statıstıkany kórseńizder, onyń 89 paıyzy –Reseıge kóship jatqan azamattar. Ne sebepti ekeni túsinikti», - dedi aımaq basshysy BAQ ókiliniń suraǵyna bergen jaýabynda.

Onyń aıtýynsha, Qazaqstanǵa kelemin, sonyń ishinde Soltústik Qazaqstannyń jerinde turamyn degen azamattar da az emes kórinedi.

«Jyl basynan beri Ońtústikten, Nur-Sultan qalasynan jáne syrttan 800 adam keldi. Bıyl jalpy 2300-den astam adam kóship keledi degen jospar bar. . Olardyń árqaısyna belgilengen jan-jaqty kómek memleket tarapynan tólenedi. Ár otbasy múshesine 70 mınımaldy kórsetkish tólenedi. Ol – 214 myń teńge kóleminde. Al úı satyp alamyn degen azamattarǵa 15 mınımaldyq eseptik kórsetkish mólsherinde aqsha tólenedi», - degen ákim Reseı men Ýkraındaǵy jaǵdaıǵa baılanysty óńirge qonys aýdarǵan sheteldikterdiń sany týraly túsinikteme berdi.

Oblys basshysynyń aıtýynsha, dál qazir Reseıden Soltústik Qazaqstan oblysyna qonys aýdarýshylardyń kózge kórinetindeı aǵyny baıqalyp otyrǵan joq.

Eske salsaq, osy aıdyń basynda Soltústik Qazaqstanda eki jyl jabyq bolǵan shekara beketi qaıta ashylaatyny habarlanǵan bolatyn.