SQO-dan bıyl ásker qataryna 600-ge jýyq bozbala alynbaq
SQO qorǵanys isteri departamentiniń málimetinshe, áskerge shaqyrý josparyna sáıkes osy kúzde óńirden 600-ge jýyq bozbala Otan aldyndaǵy boryshyn atqarýǵa attanýy tıis. Barlyq irikteý is-sharalarynan ótkennen keıin olar merzimdi áskerı qyzmet atqarý úshin UQK Shekara qyzmetiniń, Qarýly Kúshterdiń, Ulttyq ulannyń, Tótenshe jaǵdaılar mınıstrliginiń jáne Memlekettik kúzet qyzmetiniń áskerı bólimderine jiberiledi.
«Kúzgi shaqyrý naýqanyna daıyndyq jumystary QR Qorǵanys mınıstriniń buıryǵy negizinde 10 shildeden bastap júrgizildi. 1 qyrkúıekten bastap SQO aýmaǵynda 14 shaqyrý jáne medıtsınalyq komıssııa, onyń ishinde 12 aýdandyq, 1 qalalyq jáne 1 oblystyq shaqyrý komıssııasy jumysqa kiristi. Al oǵan deıin jergilikti áskerı basqarý organdary shilde men tamyz aralyǵynda áskerge shaqyrylýy tıis jastardy aldyn ala zerdelep, irikteý júrgizdi: densaýlyq jaǵdaıy, bilim deńgeıi, moraldyq-psıhologııalyq jáne fızıkalyq jaı-kúıine baılanysty bólý júrgizildi», - deıdi SQO qorǵanys isteri departamenti bastyǵynyń orynbasary Marat Kárimov.
Mamannyń aıtýynsha, áskerge shaqyrý qaǵazynan bólek eki jyldan beri árbir áskerge shaqyrýshyǵa SMS- habarlama jiberilip keledi.
«Áskerge barýǵa tilek bildirgender sany artyp keledi. Bul – atqarylyp jatqan jumystyń nátıjesi. Máselen, tek 2 qyrkúıek kúni ǵana Petropavl qalalyq qorǵanys isteri jónindegi shaqyrtý pýnktine 130 adam kelip, áskerge barýǵa tilek bildirdi», - deıdi Marat Kárimov.
Buǵan deıin habarlaǵanymyzdaı, 1 qyrkúıekten bastap elimizde kúzgi áskerge shaqyrý kezeńi bastaldy.
Aıta ketsek, memlekettik apparattyń qyzmetin bıýrokratııadan aryltý maqsatynda qorǵanys vedomstvosy shaqyrý ýchaskelerine tirkeý týraly kýálikterden bas tartýdy, sondaı-aq áskerı qyzmet ótkermegen azamattarǵa áskerı bılet berýdi alyp tastaýdy usynyp otyr.
Sondaı-aq, 2023 jyldan bastap « Áskerge tirkeý bıleti « qoldanystan alynady.
