SQO-daǵy jobalarǵa 10 mlrd dollar ınvestıtsııa quıylmaq
SQO ákimi Qumar Aqsaqalov qytaılyq ınvestorlarmen kezdesý ótkizdi. Óńirge Qytaıdyń iskerlik delegatsııasy birlesken jobalardy naqty talqylaý úshin kelip otyr. Sheteldik bıznesmender birneshe baǵytta jumys istemek. Bul mashına jasaý, onyń ishinde júk kólikterin qurastyrý, aýyl sharýashylyǵy ónimderin qaıta óńdeý, qant zaýytynyń qurylysy, maıly daqyldar jáne bıdaıdy tereń óńdeý boıynsha kásiporyndar ashý. Sondaı-aq ınvestorlar kabel zaýyty men transformator zaýytyn salýdy josparlaǵan.
«Jyl boıy biz kelissózder júrgizdik. Barlyǵyn eseptep, múmkindikterimizdi zerttedik. Ónimge suranys qandaı bolady, ony da qaradyq. Jan-jaqty saralaı kele qytaılyq ınvestorlarmen memorandýmǵa qol qoıyldy. Delegatsııa quryp, Hý-Veı provıntsııasyna baryp keldik. Gýbernatorlarymen áriptestik jónindegi kelisimge qol qoıdyq. Ondaǵy kásiporyndardy aralap, ekonomıkalyq áleýetin baıqadyq. Qytaı memleketi de óz saraptaýyn júrgizip, nátıjesinde Úkimet jobany qarjylandyrýdy maquldady. Biz jobany júzege asyrýǵa daıynbyz»,- deıdi SQO ákimi Q.Aqsaqalov.
Nátıjesinde jobany júzege asyrýǵa 10 mlrd dollar shamasynda ınvestıtsııa quıylmaq. 7 negizgi baǵyt boıynsha jumys isteıtin ındýstrıaldy park 67 sharshy shaqyrym aýmaqty alady. Joba 3-5 jylda júzege asyrylmaq. Qytaılyq delegatsııa áriptestik aıasynda birqatar máselelerdi talqylap, ortaq sheshim qabyldaý maqsatynda kelip otyr.
«Qytaılyq «bir beldeý, bir jol» baǵdarlamasy men sizderdiń «Nurly jol» baǵdarlamalaryńyzdyń birqatar tarmaqtary úılesetinin baıqadyq.Osy eki qujattyń negizinde ortaq máselelerdi sheshý maqsatynda kelip otyrmyz. Ekinshiden mashına qurastyrý, elektr energııa jáne taǵy basqa baǵyttaǵy áriptestikti talqylaýymyz qajet», - deıdi Azııa damý iskerlik kompanııasynyń bas dırektory Sıý Lı Ren.
Sheteldik ınvestorlar oblys ákimi Qumar Aqsaqalovty sáýir aıynda Qytaıda ótetin «Bir beldeý,bir jol» forýmyna qatysýǵa shaqyrdy.
