SQO-daǵy jedel medıtsınalyq kómek ortalyǵyna jańa ǵımarat kerek

PETROPAVL. QazAqparat – Soltústik Qazaqstan oblysyndaǵy jedel medıtsınalyq kómek kórsetý ortalyǵy ornalasqan ǵımarat 120 jylǵa jýyq ýaqyt buryn salynǵan. Óńir basshysy Aıdarbek Saparov talapqa saı ǵımaratpen qamtý máselesi boıynsha ońtaıly sheshim qabyldaıtynyn aıtty, dep habarlaıdy QazAqparat tilshisi.

Jedel járdem qyzmeti táýligine 500-den astam qońyraý qabyldaıdy. Operatorlar jedel áreket etip, shaqyrtýdyń aýyrlyǵyna qaraı brıgadany jiberedi.

«Bıyl kóptegen tásildi kúndelikti jumysymyzǵa engizdik. Mysaly, tamyr tabylmaǵan kezde, venozdyq preparattardy súıek ishine engizemiz. Bizdiń dárigerler men feldsherler ǵana SQO-da osy tásildi qoldanady. Sondaı-aq, traheıanyń ıntýbatsııasyn engizdik. Bul protsedýrany kópbeıindi aýrýhanalardaǵy reanımatologter men bizdiń feldsherler ǵana atqara alady. Qazir konıkatomııany engizip jatyrmyz», - deıdi SQO jedel medıtsınalyq kómek ortalyǵy dırektorynyń mindetin atqarýshy ıÝrıı Belonog.

Ortalyq feldsherlerge muqtaj emes. Bıyl 30 úmitker jumysqa ornalasýǵa ótinish bergen, sonyń tek úzdik degen úsheýi ǵana qabyldandy. Alaıda, munda 6 maman jetispeıdi – kardıolog, pedıatr jáne jedel járdem dárigerleri.

Al, ortalyqtaǵy basty másele – talapqa saı kelmeıtin tar ári eski ǵımarat. Arnaıy kólikti qoıatyn da oryn joq, mundaǵy garajǵa 12 mashına ǵana syıady, qalǵan 10-y qysy-jazy dalada turady.

«Ortalyqtyń ǵımaraty 1905 jyly salynǵan, qazirgi zaman talabyna saı emes. Jaqyn arada ártúrli nusqany qarastyryp, ońtaıly sheshim qabyldaımyz. Ortalyq qyzmetkerlerine bar jaǵdaıdy jasaý kerek, óıtkeni jedel járdemniń sapasy osyǵan tikeleı baılanysty», - dedi ortalyqtyń jumysymen tanysqan Aıdarbek Saparov.