SQO-daǵy zaýyt jumysy úshin ákim Premer-Mınıstrden sóz estidi
ASTANA. QazAqparat - Júk vagondaryn shyǵaratyn «Zıksto» zaýytynyń jumysyn júrgize almaı otyrǵan Soltústik Qazaqstan oblysynyń ákimi Premer-Mınıstr Baqytjan Saǵyntaevtan sóz estidi, dep habarlaıdy QazAqparat tilshisi.
Úkimettiń selektorlyq rejimdegi otyrysynda oblys ákimi Qumar Aqsaqalov 8 aıdyń qorytyndysy boıynsha aýyl sharýashalyǵy óniminiń kólemi óńirde 0,7 paıyzdy quraǵanyn atap ótken bolatyn.
«Ónerkásip óndirisiniń kólemi 154 mlrd teńge boldy. Indeks - 99,1 paıyz. Sala kórsetkishine ónerkásip óndirisi kóleminiń 14 paıyzyn alatyn mashına jasaý salasy áserin tıgizdi. Onda 31 paıyz tómendeý bar. «Qazaqstan ınjınırıng» AQ basqarýyndaǵy eki zaýyt 52 paıyzǵa tómendedi. «Munaımash» zaýytynyń tapsyrys portfeliniń qysqarýyna baılanysty 6 paıyzǵa tómendedi. Búgingi kúni tıisti sharalar qabyldap jatyrmyz. 9 aıdyń qorytyndysynda jaǵdaı túzeletin bolady», - dedi ol.
Oblys basshysynyń aıtýynsha, óńirde negizgi kapıtalǵa 105,5 mlrd teńge ınvestıtsııa tartylyp, kórsetkish 108 paıyz bolǵan. Qurylys jumystary 155 paıyz, ınflıatsııa 3,3 paıyzdy quraǵan. Jyl basynan beri 21 myń adam jumysqa tartylǵan. Onyń ishinde 10 myń jańa jumys orny ashylǵan.
«Qumar Іrgebaıuly, Sizderdegi «Zıksto» zaýytynda júk vagondaryn shyǵarý kólemi qysqardy. Negizgi sebep - jıyntyq bólshekter Reseıden kelmegen. Sol da sebep pe? Jıyntyq bólshekter Reseıden kelmedi dep óndiristi qalaı qulatamyz? ony kim qaraıdy sonda, kim baqylaıdy?», - dedi Premer-Mınıstr.
Óz kezeginde oblys basshysy bul másele Reseıge salynǵan santsııaǵa baılanysty ekendigin, qazir kelisimshart jasalyp, bólshekter alynyp jatqanyn aıtty.
«Ol shyǵaratyn oıynshyq emes qoı. Úlken zaýyt, úlken temirjol vagondary. Ol jumystardyń barlyǵy aldyn ala júrgizilýi kerek qoı. Tapsyrys bar, vagon joq. Sonda jumys qaıda?», - degen Baqytjan Saǵyntaev.
Sonymen qatar Úkimet basshysy óńir basshysynan úlken kásiporyndardy damyta almaı otyrǵanda, shaǵyn bıznesti qalaı ilgeriletpek oıy bar ekendigin surady.
«Kemshilikterdi moıyndaımyz. Shaǵyn jáne orta bıznes arqyly kemshilikterdi jóndeıtin bolamyz. Jol kartasyna engen 284 jobamyz bar. Kómek kórsetip jatyrmyz. 9 aıdyń qorytyndysynda barlyǵy durys bolýy tıis», - dedi Qumar Aqsaqalov.
«Qumar Іrgebaıuly, ótkendegi Sizdiń basqarma basshyńyzdyń baıandamasyndaǵy «esik aldyndaǵy baqshany damytý arqyly shaǵyn kásiporyndy damytamyz» degendeı is-shara bolatyn bolsa, onda alysqa barmaısyzdar», - dep eskertti Baqytjan Saǵyntaev.
Illıýstratsııalyq foto: integral-russia.ru
