SQO-daǵy túzetý mekemelerinde byltyr 19 sottalǵan nekesin qıdy
SQO qylmystyq atqarý júıesi departamenti baspasóz qyzmetiniń málimetinshe, ES-164/9 mekemesinde jazasyn ótep jatqan Nıkolaı men Alfııa úılendi. Er adamǵa bostandyqqa shyǵý úshin áli úsh jyl bar, al Alfııa bıyl maýsym aıynda bosaıdy. Kelinshek súıiktisin kútýge ýáde berdi.
«Men buǵan deıin turmysta bolǵanmyn. Alaıda, óz baqytymdy endi taptym dep oılaımyn. Men Nıkolaıdy jaqsy kóremin, ony kútemin. Bizdiń bolashaqqa josparymyz kóp», - deıdi Alfııa.
Kelinshek esirtki qylmysy úshin 3 jylǵa sottalyp, bostandyǵy shekteldi. Alaıda probatsııa tártibin buzǵandyqtan Petropavl qalalyq soty ony 3 jylǵa túrmege otyrǵyzdy. Byltyr tártibi jaqsy bolǵandyqtan jazany jeńildetip, eń tómengi qaýipsizdik mekemesine - ES-164/9-ǵa aýystyrdy.
Nıkolaı 2018 jyly «Urlyq» jáne «Qaraqshylyq» úshin 9 jylǵa bas bostandyǵynan aıyryldy. 2021 jyly sot úkimimen qalǵan merzimin ortasha qaýipsizdik mekemesinen eń tómengi qaýipsizdik mekemesinde óteıtin boldy.
«Úıdegi kúndelikti urys-keristen sharshadym. Problemany umytý úshin araq-sharapty janyma serik ettim, osylaısha alkogolge táýeldi bolyp shyǵa keldim. Bótelkesiz meniń kúnim bastalmaıtyn. Birde araqqa aqsham bolmaı, ótip bara jatqan qyzdyń sómkesine jarmastym», - deıdi Nıkolaı.
Nıkolaı men Alfııa alǵash ret eń tómengi qaýipsizdik mekemesinde kezdesti. Tanystyq mahabbatqa ulasyp, eki aıdan keıin olar úılenýge bel baılady.
«Alfııany bir kórgennen unattym. Bul jerde ómirim osylaısha ózgeredi dep oılamap edim. Baqyttymyn. Árıne, istegen isime ókinem, endi ony qaıtalamaýǵa tyrysamyn, ol maǵan ómirlik sabaq boldy», - deıdi sottalǵan.
Erli-zaıypty qazir «Eńbek-Qyzyljar» mekemesinde eńbek etedi.
«Mekemelerde nekege otyrý jaǵdaılary kóbeıgen. Bul sottalǵandarǵa oń áser etedi. Olardy merziminen buryn bosaýǵa yntalandyrady», - deıdi SQO boıynsha QAJD bastyǵynyń orynbasary Aleksandr Kochkın.
Aıta keterlik jaıt, sottalǵandar arasynda 2020 jyly 13 adam nekege otyrsa, byltyr 19 adam qarym-qatynasyn zańdastyrdy. Bıyl 2 sottalǵan nekege otyrdy.
