SQO-daǵy Teńdik aýylynda sońǵy bes jylda bir ǵana qylmys tirkelgen
Taıynsha aýdanyndaǵy Teńdik aýyly Petropavldan 170 shaqyrym qashyqtyqta jatyr. Qaımaǵy buzylmaǵan qazaq aýylynda 300 adam turyp jatyr. Eldi mekenniń ózgelerden ereksheligi – aýyl turǵyndary birneshe jyldan beri spırttik ishimdik ishýden bas tartqan. Qazir Teńdikte oıyn-toı araq-sharapsyz ótedi.
SQO polıtsııa departamenti baspasóz qyzmetiniń málimetinshe, bastamanyń arqasynda sońǵy jyldary aýylda asa aýyr qylmystar, otbasyndaǵy janjaldar, urys-keris, mas kúıinde jasalǵan jol-kólik oqıǵalary sap tyıylǵan.
Teńdik aýyldyq okrýgine ýchaskelik polıtsııa ınspektory Jambyl Qaıyrov qyzmet kórsetedi. Okrýgtiń quramyna Teńdikten basqa, Qantemir jáne Kotovskoe aýyldary kiredi. Ýchaskelik polıtsııa ınspektorynyń jumysy az emes, aýyl turǵyndarynyń quqyqtyq tártibin, qaýipsizdigi men tynyshtyǵyn qadaǵalaıdy. Al Teńdik eldi mekeninde polıtsııanyń shuǵyl aralasýyn qajet etetin máseleler joqtyń qasy.
Teńdik aýyldyq okrýginiń ákimi Erjan Qasqulaqovtyń aıtýynsha, Teńdik aýylynda spırttik ishimdikter satylmaıdy. Jastar fýtbolmen aınalysady, jergilikti sharýashylyq mektep janynan zamanaýı fýtbol alańyn salyp bergen. Aýyl turǵyndarynyń turaqty jumysy bar.
SQO PD bastyǵynyń birinshi orynbasary Qanat Aıtbaevtyń aıtýynsha, ishki ister organdary qyzmetiniń negizgi baǵyty quqyq buzýshylyqtardyń aldyn alý, qazir polıtsııa halyqpen ózara tyǵyz áriptestikke negizdelgen jumystyń servıstik modeline kóshýde. Teńdik aýylynda bes jyl ishinde bir ǵana qylmys – múlik urlyǵy tirkelgen. Budan bólek, bul aýylda polıtsııanyń profılaktıkalyq esebinde turǵandar joq.
Jalpy SQO-da 289 ýchaskelik polıtsııa ınspektory qyzmet atqarady, olardyń 201-i aýdandarda, qalǵandary Petropavl qalasynda eńbek etedi. Jyl basynan beri ýchaskelik ınspektorlar myńnan astam qylmysty ashty, onyń ishinde 581-i – urlyq, 38 308-i túrli ákimshilik quqyq buzýshylyqtar. 7 200-den astam quqyq buzýshy qoǵamdyq oryndarǵa mas kúıde kelgeni úshin jaýapkershilikke tartyldy.
