SQO-daǵy sý qoımalaryna memlekettik tapsyrys boıynsha 36,5 mln shabaq jiberiledi

PETROPAVL. QazAqparat – Soltústik Qazaqstan oblysyndaǵy sý qoımalaryn balyqtandyrý úshin bıyl sıg jáne tuqy tuqymdas balyqtardyń 36 mln 510 myń dana dernásili jiberilmek. Jumys eki kezeńde atqarylady, dep habarlaıdy QazAqparat tilshisi.

Petropavldaǵy balyq tálimbaǵynda qazir jaýapty kezeń. Arnaıy ydystarda bolashaq sıg balyqtarynyń ýyldyryqtary ósirilip jatyr. Nátıjesin kórý úshin, mamandardyń aıtýynsha, barlyq tıisti tehnologııany qoldanyp, rejimdi saqtaý qajet.

«Bizdiń tálimbaq balyqtardyń ýyldyryǵyn zaýyttyq tásilmen alyp, qoldan ósiredi. Keıin shabaqtarmen SQO-ny ǵana emes, kórshi oblystardy da qamtımyz. Qazirgi ýaqytta biz sıg balyqtarynyń ýyldyryǵyn ınkýbatsııalyq kezeńnen ótkizip jatyrmyz. Bul ońaı jumys emes. Sýdyń belgili bir temperatýrasynyń bolýyn, sondaı-aq ottegimen belgili mólsherde qanyǵýyn baqylaýda ustaý qajet. Ýyldyryqty táýlik boıy nazardan tys qaldyrmaımyz, áıtpese eńbek esh ketýi múmkin», - deıdi ınkýbatsııalyq tsehtyń meńgerýshisi Anastasııa Molotkova.

Máselen, sıg balyqtarynyń ınkýbatsııalyq kezeńi 6 aıǵa sozylady. Tálimbaq jumysshylary qarasha aıynda qajetti ýyldyryqty ázirlegen. Baǵaly materıal alý úshin SQO-nyń, Aqmola oblysynyń Şýche, Zerendi, Býrabaı aýdandaryndaǵy kólderine is saparǵa shyqqan. Nátıjesinde 110 mln dana ýyldyryq ázirlendi. Bul tek sıg tuqymdas balyqtar – sıg, rıpýs, pelıadtiń ýyldyryǵy.

«Sáýir aıynda sý +8 gradýsqa deıin jylynǵan kezde sıg balyqtarynyń shabaqtaryn kólge jiberemiz.

Bıyl sıg balyǵy boıynsha 35,5 mln shabaqqa memlekettik tapsyrys tústi. Onyń 30 mln-y – Sergeev sý qoımasyna, qalǵany Petropavl sý qoımasyna jiberilmek. Osy maqsatqa bıýdjetten 65 mln teńge bólindi. Bul qarajat eki kezeńde ıgeriledi», - deıdi Anastasııa Molotkova.

Ekinshi kezeńde tálimbaq mamandary tuqy balyǵymen jumys istemek.

«Tuqynyń ýyldyryǵyn alý úshin eshqaıda barýdyń qajeti joq, ol ózimizde jetkilikti. Balyq qystap shyǵý úshin arnaıy toǵanda ustaımyz. Mamyr aıynda, sýdyń temperatýrasy +17,+18 gradýsqa jetkende biz tuqy balyǵymen jumysty bastaımyz. Qyrkúıek aıynda ýyldyryǵy ósip, dernásilge aınalady, salmaǵy 12 gr jetken kezde biz ony sý qoımalaryna jiberemiz», - deıdi tálimbaq qyzmetkeri.

SQO-nyń sý qoımalaryna qyrkúıek aıynyń sońynda tuqy balyǵynyń 1 mln 10 myń shabaǵy jiberilmek.