SQO-daǵy stýdentter tóbelesi men rektordyń jumystan ketýi arasynda baılanys joq
Aıta ketsek, 20 qazan kúni M.Qozybaev atyndaǵy Soltústik Qazaqstan memlekettik ýnıversıtetiniń stýdentteri – 40-tan astam adam Esil ózeniniń jaǵasyndaǵy «Vostochnyı bereg» dámhanasynyń mańyna jınalyp, janjaldasyp, sońy tóbeleske ulasty. Al 21 qazanda ýnıversıtet rektory Serik Ómirbaev qyzmetinen ketti.
M.Qozybaev atyndaǵy SQMÝ baspasóz qyzmetiniń málimetinshe, 20 qazan kúni bolǵan oqıǵa men ýnıversıtettiń birinshi jetekshisi – S.M.Ómirbaevtyń jumystan ketýiniń ózara baılanysy joq.
«Ýnıversıtet rektorynyń jumystan shyǵý týraly ótinishi 2019 jyldyń 9 qazanynda tirkeldi. 2019 jyldyń 21 qazanynda QR Bilim jáne ǵylym mınıstri S.M.Ómirbaevtyń jumystan ketý týraly buıryǵyna qol qoıdy», - delingen baspasóz habarlamasynda.
Joǵary oqý ornynan habarlaǵandaı, jergilikti quqyq qorǵaý organdary oqıǵany tergep jatyr. Tóbeleske belsendi qatysqan 4 stýdent anyqtaldy.
