SQO-daǵy shalǵaı aýdanda «ashyq ákimdik» jumysyn bastady

PETROPAVL. QazAqparat – Soltústik Qazaqstan oblysynyń Talshyq eldi mekeninde «open space» formatynda jumys isteıtin servıstik ákimdik ashyldy, dep habarlaıdy QazAqparat tilshisi.

SQO Aqjar aýdanynyń ortalyǵy Talshyqta iske qosylǵan «ashyq ákimdikte» qurylys, bilim, kommýnaldyq jáne aýyl sharýashylyǵy, jumyspen qamtý jáne AHAJ bólimderi jumys isteıdi. Budan bylaı aýdan turǵyndary memlekettik qyzmetshilerdi ár kabınetten izdep sabylmaı, qajetti qyzmetterdi bir orynnan alatyn boldy.

Ortalyqtyń ashylýyna aýdan ákimi Erbatyr Madıarov, oblys ákiminiń orynbasary Ǵanı Nyǵymetov, Sybaılas jemqorlyqqa qarsy qyzmet departamenti basshysynyń birinshi orynbasary Nurlan Jahın men «Qyzyljar – adaldyq alańy» jobalyq keńsesiniń jetekshisi Amangeldi Satanov qatysty.

«Óńirde memlekettik organdardyń ashyqtyǵy men aıqyndylyǵy qaǵıdattaryna erekshe kóńil bólinedi. Aýdandyq front-ofıs keńes berý, qujattardy qabyldaý jáne halyqqa kómek kórsetý úshin qolaıly alań qurýǵa baǵyttalǵan. Sonymen qatar, «Qyzyljar – adaldyq alańy» jobasy aıasynda dástúrli túrde azamattardyń ashyq qabyldaýlary ótkizilip, turǵyndardyń máseleleri sheshimin tabýda. Oblys ákimdiginiń barlyq keńesteri online rejıminde ótkiziledi. «Ashyq bıýdjetterdiń ınteraktıvti kartasy» arqyly halyq bıýdjet aqshasynyń bólinýin jáne jumsalýyn qadaǵalaı alady», - dedi Ǵanı Nyǵymetov.

Qonaqtar jańadan ashylǵan servıstik ákimdiktiń jumysymen tanysyp, qyzmetkerlermen áńgimelesti.

«Búgin biz birneshe nysanǵa baryp, sonyń ishinde aýyl ishindegi joldardy jóndeý jumystaryn kórdik. Halyqpen júzdesip, jalpy oń áser aldyq. Aqjar aýdanynyń ákimi usynǵan «ashyq ákimdik» tujyrymdamaǵa sáıkes keledi. Ashyqtyq jáne eseptilik bar. Bul open space, bos keńistik. Jalpy yńǵaıly jáne kedergisiz jaǵdaılar jasalǵan», - dedi Nurlan Jahın.

SQO-da 2019 jyldan bastap aýdandar men qalalarda 9 servıstik ákimdik ashyldy. Jyl sońyna deıin barlyq aýdan ákimdikteriniń jumysyn «open space» formatyna kóshirý josparlanǵan.