SQO-daǵy shaǵyn aýyl mektebiniń toǵyz túlegi de bilim granty ıegeri atandy
SQO Mamlıýt aýdany Bekseıit orta mektebiniń bıylǵy 9 túlegi de joǵary oqý ornyna grantqa tústi. Talapkerlerdiń úsheýi L.Gýmılev atyndaǵy Eýrazııa Ulttyq ýnıversıtetin, qalǵany – jergilikti M.Qozybaev atyndaǵy Soltústik Qazaqstan ýnıversıtetin tańdaǵan. «Altyn belgi» ıegeri Nuraı Tekebas endi «aqparattyq tehnologııalar» mamandyǵy boıynsha oqıdy. Taǵy eki túlek osy mamandyqty tańdasa, bireýi ósimdik sharýashylyǵy boıynsha bilim alady. Qalǵan talapkerler túrli pánnen muǵalim mamandyǵyn alyp shyqpaq.
«Bul rette árbir shákirtine óz júreginen oryn berip, bolashaǵynan úlken úmit kútip, bar erkeligin kóterip, qalaǵan mamandyǵynyń grant ıesi bolýyna kúsh-jigerin jumsaǵan ustazdar qaýymy men balalarynyń bolashaǵy úshin báıek bolǵan ata-analardyń da eńbegi ólsheýsiz. Bul ustazdar qaýymy úshin eńbektiń aqtalǵany, zor jetistik, erekshe qýanysh dep bilemiz», - deıdi Bekseıit orta mektebi dırektorynyń orynbasary Ákejan Maqsatuly.
Aýyl mektebin byltyr 7 bala bitirse, solardyń altaýy grantqa túsken, bireýi joǵary oqý ornyn aqyly túrde oqyp jatyr.
«Balalarymyzdyń osyndaı jaqsy kórsetkishke jetýi, eń aldymen ustazdarymyzdyń, ıaǵnı búkil mektep ujymynyń birige, jumyla eńbek etýi, UBT-ǵa balalardy daıyndaıtyn muǵalimderdiń ózderiniń jeke ýaqyttaryn bólip, oqýshylarynyń jetistikke jetsin, jaqsy bilim alsyn, grant ıegeri atansyn degen tilegi», - deıdi Ákejan Maqsatuly.
Ótken oqý jylynda Bekseıit orta mektebinde 63 oqýshy oqýǵan. Bıyl 1-synypqa ázirge 4 búldirshindi qabyldap otyr. Mektep dırektory orynbasarynyń aıtýynsha, muǵalim jetispeýshiligi joq. Qazir 25 ustaz eńbek etse, sonyń 9-y – osy bilim ordasynyń túlekteri.
Jalpy SQO-da bıyl 74 myńnan astam oqýshy bilim aldy. Olardyń 3 387-si – 11-synypty támamdady. Olardyń shamamen 75 %-y UBT-ǵa qatysýǵa tilek bildirdi.
