SQO-daǵy Sergeevskoe sý qoımasynda sý qalypty deńgeıden 46 sm kóterildi
PETROPAVL. QazAqparat – Soltústik Qazaqstan oblysyndaǵy Sergeevskoe sý qoımasynyń tarıhyndaǵy sýdyń eń joǵary kóterilýi 2017 jyly tirkelgen edi, dep habarlaıdy QazAqparat tilshisi.
«Qazgıdromet» RMK fılıaly sý qoımasynyń irgesi qalanǵan ýaqyttan beri bógettiń erneýinen sý tasý derekterin jınaǵan.
2017 jyly aımaqta sońǵy jyldardaǵy eń qatty sý tasqyny boldy. Ol kezde sýdyń tasý mólsheri 338 sm-ge jetti. Bul – Sergeevskoe sý qoımasynyń búkil tarıhyndaǵy jalǵyz jaǵdaı. 1986 jylǵy sýdyń asyp ketý deńgeıi atalǵan kórsetkishke sál jýyqtap, 280 sm-di qurasa, 1985 jáne 1987 jyldary 270 sm-den boldy. Sý 1980, 1983, 1985-1987, 1990, 1994, 2002, 2005, 2007, 2014, 2016 jáne 2017 jyldary bóget qyrynan 2 m-den asyp ketken bolatyn.
Sergeevskoe sý qoımasy kóktemde múlde tolmaǵan, ıaǵnı sýdyń tolyp ketýi baıqalmaǵan jaǵdaılar da boldy. Bul 1975 jyldan beri eki ret, 2009 jáne 2010 jyldary bolǵan. Erneýine sáıkesinshe 128 jáne 111 sm jetpeı qaldy.
Bıyl maksımaldy deńgeı 46 sm-di qurap otyr. Biraq bul rekordtyq tómen kórsetkish emes. 1992 jyly tolyp ketý kórsetkishi nebári 13 sm, al 1999 jáne 2000 jyldary odan da az, sáıkesinshe 8 jáne 6 sm boldy. 2006 jyly atalǵan kórsetkish bar bolǵany 2 sm-di quraǵan bolatyn.
Soltústikqazaqstandyq «Qazgıdromet» mamandary kóktemgi sý tasqyny barysyna oblys aýmaǵynda ǵana emes, Esil ózeniniń barlyq sý jınaý alańynda da túrli faktorlar áser etetinin qosty. Onyń ishinde jaýyn-shashyn mólsheri, qar jamylǵysyndaǵy sý qory, topyraqtyń qatý tereńdigi, onyń ylǵaldanýy, temperatýralyq fon bar.
