SQO-daǵy Sergeev sý qoımasynda sý deńgeıi túsip jatyr
«Qazgıdromet» RMM SQO fılıalynyń málimetinshe, Sergeev sý qoımasyndaǵy sý deńgeıi bir táýlikti 27 sm tómendedi. Qazir bógennen sý 114 sm asyp-tógilip jatyr. Eń maksımaldy kórsetkish 17 sáýir kúni tirkelip, erneýinen 167 sm asyp tógildi.
Sergeev sý qoımasynan tómen Esil boıynda ornalasqan gıdroposttarda, kerisinshe sý deńgeıi kóterilip keledi. Pokrovka eldi mekeni mańynda 78 sm, Novonıkolskoe aýylynyń mańynda 45 sm, Dolmatovo janynda 83 sm, Petropavlda 178 sm kóterilgen.
Al oblystyń shaǵyn ózenderinde sý deńgeıi turaqty túrde tómendep keledi.
Imanburlyq, Aqanburlyq, Babyqburlyq, Qamysaqty, Sharyq, Muqqyr ózenderinde bir táýlikte 6-123 sm aralyǵynda ózgergen. Olardyń kópshiliginde muz joq.
Úlken Torańǵul kóli de mamandardyń baqylaýynda. Bir táýlikte sý deńgeıi 2 sm artyp, 366 sm qurady.
Jalpy, sý deńgeıi oblystaǵy 19 gıdropost arqyly baqylanady. Olardyń 16-sy Esil ózeni men onyń saǵalarynda ornalasqan. Ekeýi Sergeev jáne
Petropavl sý qoımalarynda bolsa, bireýi Úlken Torańǵul kólindegi ózgeristi baqylap otyrady.