SQO-daǵy Pokrovka aýylynda balalarǵa arnalǵan sport zaly ashyldy
«Qazaqstan halqyna» qoǵamdyq qorynyń bastamasymen jáne «Batyr bolamyn!» qorymen birlese ashylǵan zal 40 balaǵa arnalǵan. Bul – «Qazaqstan halqyna» qorynyń «24 balalar sport zaly» qaıyrymdylyq jobasy aıasynda ashylǵan 8 nysan.
«Bul aýylda zaldyń ashylýy kezdeısoq emes. Búgingi tańda balalar sportyn damytý úshin munda jaǵdaı jasalmaǵan. Shalǵaı aýyl turǵyndarynyń jaqyn mańdaǵy eldi mekenderge baryp, sport sektsııalaryna qatysýǵa múmkindigi joq. Jobanyń basty maqsaty – elimizdiń osyndaı shalǵaıdaǵy eldi mekenderinde balalar úshin sportqa qoljetimdilik deńgeıin arttyrý. Joba aıasynda 5 jastan 18 jasqa deıingi balalardy, az qamtylǵan jáne kóp balaly otbasylardan shyqqan balalardy qamtımyz», - deıdi uıymdastyrýshylar.
Pokrovka aýylynda ashylǵan jańa sport zaly turǵyndardyń demeýshilik qarajaty men qaıyrymdylyǵy esebinen salynǵan ǵımaratta ornalasqan. Jaqynda ǵımaratty memleket menshigine berý josparlanyp otyr. Bul jerde balalar qazaq kúresinen, boks, gımnastıka jáne t.b. sport túrlerinen arnaıy jabdyqtalǵan zaldarda jattyǵady. Turaqty negizde 40-50 bala sportpen aınalyspaq.
24 zaldy ashýǵa arnalǵan qaıyrymdylyq baǵdarlamasynyń bıýdjeti – 183 mln teńge shamasynda. Búgingi tańda Aqmola oblysy Tselınograd aýdany Tasty kentinde, Almaty oblysy Uıǵyr aýdany Avat kentinde, Mańǵystaý oblysy Beıneý aýdany Beıneý jáne Aqjigit kentterinde, Almaty oblysy Sarqan aýdany Cherkassk kentinde, Qaraǵandy oblysy Nura aýdany Izendi kentinde jáne Almaty oblysy Qazaqstan aýylynda osyndaı sport zaldary jumys istep jatyr.
