SQO-daǵy Pogodın drama teatry kórermenderin birneshe premeramen qýantpaq
PETROPAVL. QazAqparat – Soltústik Qazaqstan oblysyndaǵy Nıkolaı Pogodın atyndaǵy orys drama teatry bıylǵy ataýly datalarǵa oraı repertýarlaryn jańa spektakldermen tolyqtyrmaq, dep habarlaıdy QazAqparat tilshisi.
Oblystyq teatr Abaıdyń 175 jyldyǵyna oraı Muhtar Áýezovtiń «Abaı joly» romany jelisi boıynsha spektakl qoımaq. Ony belgili rejısser Talǵat Temenov sahnalaıdy.
Sondaı-aq ujym Jeńistiń 75 jyldyǵyna baılanysty óner ujymy kórermenderine «Nebesnyı tıhohod» spektaklin usynbaq. Alekseı ıAkovlevtiń «ıA lıýblıý tebıa, eskadrılıa» pesasy negizinde 1946 jyly kórkem fılm túsirildi. Sol sebepti shyǵarma aǵa býyn ókilderine jaqsy tanys.
«Soǵys taqyrybynda jazylǵan shyǵarma óte kóp. Tańdaý qıyn boldy. Ujymmen barlyǵyn saralap, qarap shyqtyq. Sóıtip tańdaýymyz osy pesaǵa tústi. Bul qoıylym arqyly adamdardyń soǵys ýaqytynda da mahabbat, adaldyq, dostyq, súıispenshilik sekildi sezimderdi umytpaı, joǵary baǵalaǵanyn kórsetkimiz keledi. Fılmde akterler osy sezimderdi erekshe jetkize aldy. Munymen qosa, kórkem týyndy soǵys aıaqtalysymen halyqqa úmit berý maqsatynda jaryqqa shyqty. Biz de qandaı jaǵdaıda bolmasyn adamı qasıetterden aırylmaý qajettigin aıtqymyz keledi», - deıdi N.Pogodın atyndaǵy oblystyq orys drama teatrynyń kórkemdik jetekshisi Elena Pokras.
Teatr akterleriniń daıyndyqty bastaǵanyna on shaqty ǵana kún ótken. Anatolıı Nargelenas bul qoıylymda basty rólderdiń birin somdaıdy. Onyń pikirinshe, pesada adamdar arasyndaǵy qarym-qatynas jaqsy kórsetilgen.
«Soǵysqa qaramastan adamdardyń boıyndaǵy jaqsy qasıetter eshqaıda joǵalǵan joq. Kerisinshe, osyndaı qıyn ýaqytta barlyǵynyń qadirin jaqsy túsine bastaısyń. Jaqsylyqqa úmit artasyń. Meniń de keıipkerim dál solaı aınala otqa oranyp jatsa da soǵystyń aıaqtalyp, otaý quratynyna senedi», - deıdi sahnager.
Qoıylymnyń tusaýkeseri sáýir aıyna josparlanǵan.
