SQO-daǵy kólderdiń birinde balyq qyrylyp qaldy
PETROPAVL. QazAqparat – Soltústik Qazaqstan oblysyndaǵy Balyqty kólinde balyq qyryldy. Sý jándiginiń neden ólgenin anyqtaý úshin oqıǵa ornynda balyq sharýashylyǵy ınspektsııasynyń mamandary jumys istep jatyr, dep habarlaıdy QazAqparat tilshisi.
SQO Esil aýdanyndaǵy Balyqty kólinde balyqtyń kóptep qyrylyp jatqandyǵy jaıly jazba áleýmettik jelide paıda boldy .
Jazba ıesi balyqtyń ólýine kóldi jalǵa alýshylardyń ýaqytynda aeratsııa júrgizbeýi sebep bolýy múmkin degen pikir qaldyrdy .
SQO prokýratýrasy bul jaǵdaıdy nazardan tys qaldyrmady. Prokýrorlardyń aıtýynsha, Esil aýdanyndaǵy Balyqty kóline tabıǵatty qorǵaý prokýratýrasynyń tapsyrmasymen Esil oblysaralyq basseındik balyq sharýashylyǵy ınspektsııasynyń mamandary tekserispen bardy. Onyń nátıjesi jaıynda qosymsha habarlamaq.
Inspektsııa mamandary kóldi jalǵa alýshydan túsinik aldy. Aıtýlarynsha, sý qoımasynda bir apta buryn aýmen balyq aýlaý úshin muzoıyq jasalǵan. Qalyń qardyń qysymymen sý oıyq arqyly muzdyń ústine ketken. Saldarynan balyq aýlaý múmkin bolmaǵan.
«Kún jyly bolyp, balyq oıyq arqyly ottegimen baıytylǵan sýmen muz betine shyqqan. Keıin qaıtyp kire almaǵan. Túnde aýa temperatýrasy tómendep, sý qatyp qalǵan. Ólgen balyq jınap alyndy. Al muzoıyq arqyly sý jándikteri taǵy da joǵaryǵa shyqpas úshin, tıisti sharalar qoldanyldy. Qyrylǵan balyqtyń jalpy salmaǵy – 50 kg», - delingen Esil oblysaralyq basseındik balyq sharýashylyǵy ınspektsııasynyń jaýabynda.
Esil aýdany Qaraǵash aýylynyń mańynda ornalasqan Balyqty kóliniń aýmaǵy 772,6 ga alyp jatyr, tereńdigi 2,8 m bolsa, ortasha tereńdigi – 1,5 m. Mamandardyń aıtýynsha, kólde shortan, móńke, torta, aqtaban, aqqaıran balyqtar mekendeıdi. Kólden bir jylda 26 tonnaǵa deıin balyq aýlaýǵa ruqsat berilgen.
