SQO-daǵy kólderde balyq qyrylyp jatyr
PETROPAVL. QazAqparat – Soltústik Qazaqstan oblysyndaǵy taǵy úsh kólde balyq qyrylyp jatyr, dep habarlaıdy QazAqparat tilshisi.
SQO Ekologııa departamenti óńir kólderinde balyqtyń qyrylý deregin áleýmettik jelilerge monıtorıng júrgizý barysynda anyqtaǵan.
Mamandardyń aıtýynsha, Qyzyljar aýdany Presnovka aýylynyń mańyndaǵy Prýd kólinde 150 kg móńke balyǵy ólgen. Sý qoımasy eshkimge jalǵa berilmegen, balyq sharýashylyǵy sý aıdyndarynyń rezervtik qoryna alynǵan eken.
Balyqtyń qyrylý sebebin anyqtaý úshin ekologtar, Esil oblysaralyq basseındik balyq sharýashylyǵy ınspektsııasy, SQO ákimdiginiń tabıǵı resýrstar jáne tabıǵat paıdalanýdy retteý basqarmasy, Qyzyljar aýdanynyń veterınarııalyq qyzmeti mamandary attandy. Zerthanalyq taldaý júrgizý maqsatynda kól sýynyń jáne balyq ushasynyń synamalary alyndy. Al aýyldyq okrýg ákimdigi qazirgi ýaqytta kóldi ólgen balyqtan tazartyp jatyr.
Aıyrtaý aýdany Aryqbalyq aýylynyń mańynda ornalasqan Logovoe kólinde de ólgen móńke balyǵy sý betine qalqyp shyqqan. Munda da tıisti synamalar alyndy.
Búgin áleýmettik jelide Petropavl mańyndaǵy Pestroe kólinde de balyqtyń ólgen beınejazbasy jarııalandy.
Buǵan deıin Taıynsha aýdany Teńdik aýylynyń mańyndaǵy Chaglınka ózeninde balyq qyryldy. Bul sý aıdyny, ekologtardyń aıtýynsha, jergilikti mańyzy bar balyq sharýashylyǵy sý aıdyndarynyń tizbesine engizilmegen.Esterińizge salaıyq, Qyzyljar aýdany Býgrovoe kólinde de móńke balyǵy qyrylǵan bolatyn. Mamandar balyqtyń neden ólgenin anyqtaý maqsatynda tıisti saraptamalardy júrgizdi. Nátıjesi tek 5 kúnnen keıin ǵana belgili bolmaq. Aldyn ala boljam boıynsha, balyq aýa jetpeı qyrylǵan.
