SQO-daǵy eń jalaqysy joǵary mamandyqtar belgili boldy
PETROPAVL. QazAqparat - Soltústik Qazaqstan oblysynda túrli mamandyqtar men laýazymdarǵa tólenetin jalaqylardyń mólsheri esepteldi, dep habarlaıdy «QazAqparat» HAA tilshisi SQO statıstıka departamentine silteme jasap.
Arnaıy júrgizilgen zertteýler ótken jyly basqarýshy laýazymdardy ıelenip otyrǵandardyń ortasha jalaqysy biliktilik deńgeıi joǵary mamandardikinen 1,2 ese, orta deńgeıli mamandardikinen 1,6 ese, arnaıy biliktiligi joq jumysshylaran 2,4 ese kóp bolǵanyn kórsetti.
Mashına jáne jabdyq óndirý salasynda eń kóp jalaqyny baǵdarlamamen basqarylatyn manıpýlıatorlar men stanok jóndeýshiler alyp otyr. Olardyń jalaqysy 222 myń teńge.
Qurylysta biliktiligi joǵary mamandar arasynda byltyr ýchaske basshylary eń kóp jalaqy - 167 myń teńge alǵan. Bilikti mamandar arasyndaǵy eń kóp jalaqy kirpish qalaýshylarǵa tıesili - 215 myń teńge.
Professorlar men dotsentter 197 myń teńgeden alady, olardan keıin 132,5 myń teńgemen arnaıy bilim berý júıesiniń oqytýshylary tur. Mektep, lıtseı, gımnazııa muǵalimderi 114 myń teńge alsa, tárbıeshilerdiń kómekshileri, kútýshiler aı saıyn 47-49 myń teńgeni qanaǵat tutyp otyr.
Aýyl sharýashylyǵynyń arasynda eń qaltaly traktorshy-mashınıster, avtokólik quraldarynyń tehnıkalyq jaǵdaıyn baqylaýshylar bolyp otyr, olar aıyna 280 myń teńge tabady.
«Ekonomıkalyq qyzmettiń barlyq túrin aıtqanda, eń tómengi jalaqy -mamandyǵy joq jumysshylarda. Olar: kúzetshiler, júk tıeýshiler, qosalqy jumysshylar, eden jýýshylar, t.b.», - deıdi SQO statıstıka departamentindegiler.
