SQO-daǵy eki zaýytta qosymsha 150 jumys orny ashylady

PETROPAVL. QazAqparat - QR Premer-Mınıstriniń orynbasary - Qorǵanys jáne aeroǵarysh ónerkásibi mınıstri Asqar Jumaǵalıev Petropavl qalasyna jumys sapary kezinde otandyq qorǵanys-ónerkásip kesheniniń jetekshi kásiporyndaryna - Kırov atyndaǵy zaýyt (KaZ), Petropavl aýyr mashına jasaý zaýyty (PAMZ) jáne «ZIKSTO» AQ-na bardy, dep habarlaıdy QazAqparat.

QR Qorǵanys jáne aeroǵarysh ónerkásibi mınıstrliginiń baspasóz qyzmetiniń málimetinshe, sapar barysynda Asqar Jumaǵalıev kásiporyndardyń óndiristik qyzmetimen jáne shyǵarylatyn ónim jelisimen tanysty. Sondaı-aq, «KaZ» jáne «PAMZ» AQ basshylary mınıstrdi nátıjeleri boıynsha ishki jáne syrtqy naryqtarǵa baǵdarlanǵan básekege qabiletti jańa ónim shyǵarýdy ıgeretin tehnologııalyq jańǵyrtý barysy týraly habardar etti.

Óz kezeginde, vıtse-premer Asqar Jumaǵalıev aldaǵy 2 jylda osy zaýyttardy tehnologııalyq jańǵyrtýǵa 6,6 mlrd teńge salynatynyn atap ótti.

«Memleket zaýyttardy jańǵyrtýǵa qomaqty qarjy bóledi. Osynyń arqasynda qosymsha 150 jańa jumys orny ashylady, bul óńirdiń áleýmettik-ekonomıkalyq damýy úshin óte mańyzdy. Óz kezeginde, biz sizden sapaly, básekege qabiletti ónim kútemiz», - dedi A.Jumaǵalıev.

Ol kásiporyndarǵa qazirdiń ózinde ónimdi satý jáne uzaq merzimdi kepildendirilgen tapsyrystar alý úshin eksporttyq baǵyttardy oılastyrýdy tapsyrdy.

Premer - Mınıstrdiń orynbasary jumys sapary barysynda «ZIKSTO» AQ-da da bolyp, zaýyttyń óndiristik tsehtaryn jáne kásiporynnyń ónimderin aralap kórdi.

Sapar nátıjesinde QR Premer-Mınıstriniń orynbasary - Qorǵanys jáne aeroǵarysh ónerkásibi mınıstri Asqar Jumaǵalıev QÓK kásiporyndaryn damytý jóninde birqatar tapsyrma berdi.

Jumys saparynyń sońynda Asqar Jumaǵalıev Soltústik Qazaqstan oblysy ákiminiń qorytyndy esep berý kezdesýine qatysty.

Aıta keterligi, «S.M. Kırov atyndaǵy zaýyt» AQ 1928 jyly salynǵan. Zaýyt munaı-gaz salasy men temir jol kóligi úshin avtomatıka quraldaryn shyǵarady, keshendi, lokomotıvtik qaýipsizdik qurylǵylary men radıostansalardyń serııalyq óndirisi ıgerildi.

Al, «ZIKSTO» AQ 1993 jyly qurylǵan. Zaýyt vagondardy (jartylaı vagondar, astyq tasyǵyshtar, platformalar) shyǵarady, jartylaı vagondardyń, vagondardyń qyzmet etý merzimin uzarta otyryp, kúrdeli jóndeýdi, elementterdi, arnaıy ónimderdi aýystyra otyryp, dóńgelek juptaryn daıyndaýdy jáne jóndeýdi júzege asyrady.

Sondaı-aq, «PAMZ» AQ 1993 jyly qurylǵan. Zaýyt arnaıy maqsattaǵy mashınalar men jabdyqtar shyǵarady.