SQO-daǵy Bulaq aýylynda radıatsııa mólsheri shekti deńgeıden aspaǵan – mamandar pikiri
PETROPAVL. QazAqparat – Soltústik Qazaqstan oblysyndaǵy Bulaq aýyly turǵyndarynyń «jaqyn mańdaǵy ken ornynan shyǵatyn radıatsııadan zardap shegip jatyrmyz» degen kúdigi beker bolyp shyqty, dep habarlaıdy QazAqparat tilshisi.
Soltústik Qazaqstan oblysynyń ákimi Qumar Aqsaqalovtyń qoǵamdyq qabyldaýyna Bulaq aýylynyń týmasy kelip, jerlesterin sol mańdaǵy altyn kenin óndiretin kásiporynnyń ýlap jatqanyn aıtqan edi. Onyń sózine qaraǵanda, saldarynan eldi meken turǵyndaryn onkologııalyq dert meńdegen. Osyǵan oraı áleýmettik jelide shý shyǵyp, jurt máseleniń anyǵyn aıtýdy surady.
Ókiletti organ mamandary Bulaq aýylyndaǵy, kásiporyndardaǵy radıologııalyq kórsetkishti aldy. Halyq iship otyrǵan sýdyń synamasyn zerthanada tekserdi.
«Óndiristik alańdarda 330 ret, «Áýlıe Gold Maınıng» JShS óndiristik jáne turǵyn úı jaılarynda 62 ólsheý júrgizildi, shekti deńgeıden asyp ketý anyqtalǵan joq. Eldi mekende de 2017-2019 jyldar aralyǵynda memlekettik tapsyrys aıasynda radıatsııalyq fon deńgeıin anyqtaý úshin 90 ólsheý júrgizildi. Ruqsat etilgen deńgeıden asyp túsýshilik anyqtalǵan joq. Osy aralyqta aýyz sýdyń 45 synamasy zertteldi, aýytqýshylyq anyqtalǵan joq», - deıdi oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Serikbaı Qasmaqasov.
Esil aýdanyndaǵy Bulaq aýylynda 393 adam turady. Mamandardyń málimetinshe, Bulaq aýyldyq okrýgi boıynsha onkologııalyq ósim joq. Qazir dıspanserlik esepte 5 adam tur. Qaıtys bolǵandardyń ortasha jasy – 71.
«Sońǵy 10 aı ishinde Bulaq aýylynda 5 adam kóz jumdy. Onyń ekeýi qaterli isik dertinen qaıtys bolsa, qalǵandary kárilik jetip, ómirden ozdy. Onkologııalyq aýrýlardyń ósimi joq», - deıdi oblystyq Densaýlyq saqtaý basqarmasy basshysynyń orynbasary Nurlan Aımanov.
