SQO-daǵy áıelder kolonııasynda kelinder baıqaýy ótti
PETROPAVL. QazAqparat – Soltústik Qazaqstan oblysyndaǵy ES-164/6 mekemesinde halyqaralyq áıelder kúnine oraı kelinder baıqaýy ótti, dep habarlaıdy QazAqparat tilshisi.
164/6 mekemesinde mereke qarsańynda «Sýper kelin» atty baıqaý uıymdastyryldy. Kelinshekter ádemilik pen ádeptilikten, qonaqjaılyqtan jáne qol ónerinen synǵa tústi, dep málim etti qylmystyq atqarý júıesi departamenti baspasóz qyzmeti.
Baıqaýǵa mekemeniń barlyq otrıadtarynyń ókilderi daıyndaldy, olardyń árqaısysynyń óz shyǵarmashylyq kómek jáne qoldaý toby boldy.
Elena úsh jyldan beri áıelder kolonııasynda jazasyn ótep jatyr. Ol barlyq baıqaýlarǵa, qoǵamdyq is-sharalarǵa belsene qatysady. Úlgili tártibi úshin bostandyqqa merziminen buryn shyǵýdy armandaıdy. Bul joly da «Sýper kelin» baıqaýyna qatysyp, birinshi orynǵa talasyp baqty.
«Raýshan gúliniń sýretin saldym, qamyr ılep, ettiń nanyn jaıdym. Úlken, ári tatý otbasymnyń bolǵanyn qalaımyn. Іstegen isime ókinemin, tezirek bostandyqqa shyqqym keledi», - deıdi baıqaýǵa qatysýshy Elena.
«Sýper kelin» baıqaýy mekemede alǵash ret uıymdastyrylyp otyr. Bul joly qatysýshylar 4 synnan ótti. Qoldan jasaǵan buıymdaryn kórsetti, qonaqjaılyq tanytyp, salt-dástúrdi pash etti. Sondaı-aq qazylar alqasyna aldyn ala ázirlegen shyǵarmashylyq nómirdi usyndy.
Jazasyn óteýshi L. «Sýper kelin» dep tanyldy. Ol baǵaly syılyqpen marapattaldy.
Sondaı-aq qatysýshylardyń arasynan «eń qonaqjaı kelin» jáne «eń eńbekqor kelin» nomınatsııalary boıynsha jeńimpazdar anyqtaldy.
«Búgin jeńiske jetkenime qýanyshtymyn. Bul baıqaýǵa uzaq daıyndaldym, eńbegim esh ketpedi. Bostandyqqa shyǵysymen óz kásibimdi ashpaq oıym bar. Balalarymdy qatty saǵyndym», - deıdi baıqaý jeńimpazy L. esimdi kelinshek.
