SQO-daǵy aýyldyń týmasy jerlesterine feldsherlik pýnktti syılady

PETROPAVL. QazAqparat - Soltústik Qazaqstan oblysynda Aqjar aýdanynyń týmasy Qasymjan Táshmetov týǵan aýylynda feldsherlik-akýsherlik pýnkt ashýǵa demeýshilik kómek kórsetti, dep habarlaıdy QazAqparat tilshisi.

Feldsherlik-akýsherlik pýnkt Aqjar aýdanynyń 326 turǵyny bar Maı aýylynda ashyldy. Osy aýyldaǵy úıde Qasymjan Táshmetov pen onyń toǵyz baýyrynyń balalyq shaǵy ótken eken. Úı qańyrap, bos turmaýy úshin ony halyq ıgiligine berýdi sheshken. Ǵımaratty berip qana qoımaı, qaltasynan 2 mln teńge shyǵaryp, kúrdeli jóndeýden ótkizdi.

Qasymjan qazir Kókshetaý qalasynda turady. Q.Qurmanbaev atyndaǵy týberkýlezge qarsy dıspanserdiń bas dárigeri. Medıtsına ǵylymdarynyń doktory. Sol sebepti, úlken, ári yńǵaıly úı bos turmasyn jáne halyqqa óz paıdasyn tıgizsin degen nıetpen ony feldsherlik akýsherlik pýnktke bergen eken.

«Birinshiden, aýyldaǵy medıtsınalyq qyzmettiń deńgeıin jaqsartýǵa az da bolsa úles qosý. Ekinshiden, basqalarǵa úlgi kórsetý. Týǵan jerin damytqysy keletin, elge kómekteskisi keletin azamattarǵa jaqsy bastama bolsyn. Al halyq bul medıtsınalyq pýnktke tek profılaktıkalyq tekserilýge ǵana keletin bolsyn. Halqymyz aýyrmasyn, densaýlyqtary myqty bolsyn dep tileımin», - deıdi Qasymjan Táshmetov.

Medıtsınalyq pýnktte jaıly ári keń terapevtiń qabyldaý kabıneti, em-shara kabıneti, pedıatr bólmesi bar. Maı aýylynyń turǵyndaryna 2 bilikti maman qyzmet kórsetedi.

«Jańadan ashylǵan medpýnkt barlyq qajetti qural-jabdyqpen jabdyqtalǵan. Sonyń ishinde elektrokardıogramma apparaty, tonometr, nebýlaızerler bar. Alǵashqy kómekke qajet barlyq qural-jabdyqtar jetkilikti. Kompıýter ınternetke qosylǵan», - deıdi medıtsınalyq ortalyqtyń meıirbıkesi Janargúl Qusaıynova.

Aqjar aýdany Maı aýylynda medıtsınalyq ortalyq ashýǵa demeýshilik kómek kórsetkeni úshin Qasymjan Táshmetov oblys ákiminiń Qurmet gramotasymen marapattaldy. Sondaı-aq aýylda Qasymjan Qalıjanulynyń «Sónbes shyraq» atty kitaby tanystyryldy.