SQO-daǵy aýyldardyń birinde esirtki zerthanasy anyqtaldy
SQO polıtsııa departamenti baspasóz qyzmetiniń málimetinshe, esirtki qylmysyna qarsy is-qımyl basqarmasynyń qyzmetkerleri sıntetıkalyq esirtkini jasap, satýmen aınalysty degen kúdikpen otbasyny ustady.
Jedel-tergeý is-sharasy barysynda esirtki zattarynyń Petropavlda qoldan-qolǵa berilý arqyly satylyp, psıhobelsendi esirtki preparattarynyń oblys ortalyǵynan 120 shaqyrym jerde jasalatyndyǵy anyqtaldy.
Jambyl aýdanyndaǵy eldi mekenderdiń birinde polıtseıler arnaıy jaraqtandyrylǵan zerthanany tapty. Munda sıntetıkalyq «tuz» jasaýǵa barlyq jaǵdaı jasalǵan: nysan jeldetilip, túrli qajetti ydystar, tipti qorǵanysh kostıýmderi men respıratorlarǵa deıin bolǵan. Zańsyz kásipti azamattyq nekedegi erli-zaıypty jáne olardyń jaqyn týystary qurypty.
Operatsııa barysynda polıtseıler satýǵa býyp-túıilip ázirlengen 55 gr sıntetıkalyq esirtkini tapty. Sondaı-aq zerthanadan oraýǵa arnalǵan zattar, uıaly telefondar, dárihana tarazysy, arnaıy dápter jáne sıntetıkalyq esirtkige uqsas 700 gr untaq tabylyp, alyndy. Bul attardyń barlyǵy sot-hımııalyq zertteýge jiberildi.
«Bul topty ustaý úshin ótken jyldyń qazan aıynan bastap orasan jumys júrgizildi. Qazir bul derek «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» baby boıynsha Sotqa deıingi tergep-tekserýlerdiń biryńǵaı tilimine engizildi. Tórt kúdikti – eki er adam men eki áıel qamaýǵa alyndy. Tergeý júrip jatyr», - deıdi SQO PD bastyǵynyń orynbasary Rýslan Nazarov.
Jyl basynan esirtki qylmysyna qarsy is-qımyl basqarmasynyń qyzmetkerleri zańsyz aınalymnan 17 kg túrli esirtki zatyn aldy. 31 esirtki qylmysy anyqtaldy. Osy qylmystarǵa qatysy bar 42 adam ustaldy.
SQO-da sıntetıkalyq esirtki keń taralyp keledi. Byltyr óńirde 2 kg jýyq esirtkiniń osy túri zańsyz aınalymnan alyndy.
