SQO-daǵy aýylda hımıkattan ýlanyp otyzdan astam qoı qyrylyp qaldy

PETROPAVL. QazAqparat – Soltústik Qazaqstan oblysyndaǵy Krıvoşekov eldi mekeninde 34 qoı qyrylyp qaldy. Túlik ýly hımıkattardan ýlanǵan, dep habarlaıdy QazAqparat tilshisi.

Áleýmettik jelide ár jerde teńkıip-teńkıip jatqan qoıdyń ólekseleri túsirilgen vıdeo tarady.

Aram ólgen maldy er adamdar aýyl shetinen jınap, kózin joıý úshin tehnıkaǵa artty. Oqıǵa Shal aqyn aýdany Krıvoşekov, halyq arasynda Zarıa dep atalyp ketken eldi mekende bolǵan. Jergilikti sharýashylyqtyń aýmaǵyna kirip ketken qoı tógilip jatqan ýly hımıkattardy iship qoıǵan.

Aýyl turǵyndarynyń aıtýynsha, buǵan uqsas jaǵdaı buryn da bolǵan. Ol joly jerdi óńdeýge arnalǵan hımııalyq zat MTM aýmaǵynda tógilip, bar ósimdik kúıip ketipti. Ýly hımıkattar saqtalatyn úlken ydystar Novopokrovka aýylynda da bar. Sondyqtan turǵyndar mundaı oqıǵa áli de qaıtalanýy múmkin dep qorqady. Ýly zat quıylǵan ydys kólden 100 metrdeı jerde ǵana ornalasqan eken.

Osy oqıǵaǵa baılanysty Shal aqyn aýdany ákiminiń orynbasary Arman Dúısenbınov túsinik berdi.

«Krıvoşekov aýylynda iri JShS bar. Olar qoı ósirýmen de aınalysady. Qyrylyp qalǵan osy sharýashylyqtyń maly. Jumysshylar baıqamaı, qoı aýmaqqa kirip ketken. Saldarynan 34 bas óldi. Aýyl turǵyndary shyǵyn shekken joq», - dedi Arman Dúısenbınov.

Vıdeodan alynǵan kadr