SQO-daǵy aýyl turǵyndary kól sýyn ishýge májbúr, másele 15 jyldan beri sheshilmeı keledi
Vınogradovka eldi mekeni oblys ortalyǵyna tıip tur, ara qashyqtyq 50 shaqyrym ǵana. Alaıda munda órkenıet jete qoımaǵan. Turǵyndar ata-babalarynyń jolymen aýyl mańyndaǵy kólden sý alyp iship otyr. Onyń ózi sońǵy jyldary qurǵaı bastap, batpaqqa aınalyp jatyr.
Vınogradovkada shamamen 15 jyl buryn sý bolǵan. Qubyrmen kelgen sý saǵattap berilgen. Alaıda endi «toqal eshki múıiz suraımyn dep, saqalynan aıyryldynyń» keri kelip otyr. Mundaǵy sý máselesin sheshý maqsatynda qarajat bólinip, uńǵyma salynǵan. Biraq turǵyndardyń qýanyshy kópke barmady.
«Onyń sýyn ishýge bolmaıdy, ýly, densaýlyqqa zııan. Uńǵymanyń sýyn ishemiz dep aýyl halqynyń jartysy aýrý boldy, búırekteri aýyrady, qaterli isik aýrýymen esepke alynǵandar kóp. Sondyqtan da uńǵymanyń sýyn paıdalanýǵa qorqamyz», - deıdi eldi meken turǵyny Valentına Trýbchınskaıa.
Byltyr aýylda sý qubyryn tartý jumystary bastalǵan. Jergilikti bılik toptyq sý qubyry salynady dep sendirdi. Joba boıynsha 14 km qubyr tartylyp, sorǵy stansasy men taratý jelisi istelinýi kerek edi. Alaıda jumys bir aptaǵa ǵana sozylyp, toqtap qaldy.
«Joba eskirgen, sondyqtan ony jańartý kerek dep aıtty. Eldi mekende 500-ge jýyq turǵyn bar. Olardyń basym bóligi zeınetker, ıaǵnı bir jaqtan sý tasyp ákelýge múmkindikteri joq. Taza sýdy qansha kútýge bolady?», - deıdi Valentına
Aýyl turǵyndary kólden ákelgen sýdy matadan bes ret ótkizip, qaınatyp baryp qana tamaqqa qoldanady.
SQO Energetıka jáne turǵyn úı-kommýnaldyq sharýashylyq basqarmasynyń málimetinshe, oblysta sýmen qamtylmaǵan 226 eldi meken bar. Byltyr osy máseleni sheshýge 10,3 mlrd teńge jumsalsa, bıyl 12,3 mlrd teńge bólindi. Bul qomaqty soma 55 eldi mekenge jumsalmaq. Nátıjesinde 12 eldi mekende sýmen qamtý júıesi jaqsarady, 10 aýylǵa taza sý kelmek, al qalǵan 33 eldi mekende bastalǵan jumystar keler jyly aıaqtalady.