SQO-daǵy aýyl respýblıkanyń jartysynan astamyn gúl kóshetimen qamtyp otyr
PETROPAVL. QazAqparat – Soltústik Qazaqstan oblysy Imantaý eldi mekenindegi turǵyndar elimizdiń kóptegen óńirin jylyjaıda ósirilgen gúl kóshetterimen qamtyp otyr, dep habarlaıdy QazAqparat tilshisi.
SQO Aıyrtaý aýdanyndaǵy Imantaý aýylyn «jylyjaılar mekeni» dep ataıdy. Munda 2 myń 300 turǵyn bolsa, sonyń shamamen tórtten biri jylyjaı ustaıdy. Solardyń biri - Elena Maksıýtovanyń otbasy. Kásipker áıel bıyl túrli gúlderdiń 100 myń túp kóshetin ósirip shyǵardy. Qazir de jumysy qyzǵan. Tapsyrys boıynsha ósimdikterdi jan-jaqqa kólikke artyp jiberip jatyr.
«Jylyjaı isin qolǵa alǵanymyzǵa on jyl boldy. Bul – otbasylyq bıznes. Kúıeýim ekeýimiz aınalysamyz. Basynda tek petýnıa gúlderiniń kóshetin ǵana egetinbiz. Qazir gúl sorttarynyń túri 20-ǵa jetedi», - deıdi Elena Maksıýtova.
Kásipkerdiń aıtýynsha, otbasy egýge daıyn ónimdi negizinen Qostanaı, Nur-Sultan jáne Kókshetaý qalalaryna jiberedi.
«Memlekettik tapsyrys boıynsha jumys isteımiz, sol sebepti kóshetterdi satý jeńilirek. Biraq bıyl karantınge baılanysty merzimnen qalyp baramyz. Qaı iste bolmasyn táýekelge bel býasyń ǵoı. Mol kólemde gúl egemiz. Satylmaı qala ma dep qorqasyń. Bizdiń bıznestegi eń basty qıyndyq ta osy – satý. Jalpy, aýylda 150 otbasy jylyjaı ustaıdy. Biraq biz bir-birimizge báseke emespiz. Óıtkeni árqaısymyzdyń jyldar boıy kele jatqan klıentterimiz bar», - deıdi kásipker.
Aýyl turǵyndary gúl tuqymyn aqpanda egip, kóshetterdi maýsymǵa deıin satyp bitiredi. Bosaǵan orynǵa kókónistiń túr-túrin - qyzanaq, qııar, qyryqqabat egedi. Jaz boıy tynymsyz eńbek etip, kúz sońyna qaraı jylyjaıdy jabady.
«Imantaý aty kópshilikke jylyjaılarymen tanymal. Eldi meken turǵyndary bul isti 1996 jyldan bastap qolǵa aldy. Basynda biren-saran otbasy ǵana aınalysatyn. 2008 jyldan bastap turǵyndar jappaı osy iske bet bura bastady. Tabystary jaman emes. Qazaqstannyń kóptegen qalalarynan kelip alady. Oblystyń kóshelerinde jaıqalǵan petýnıa gúlderiniń barlyǵy osy Imantaýdan shyqqan», - deıdi Imantaý aýyldyq okrýginiń ákimi Lıýbov Serdıýk.
