SQO-daǵy aýyl okrýginde bıyl bir de bir qylmys tirkelmegen
SQO polıtsııa departamenti baspasóz qyzmetiniń málimetinshe, Bulaq aýyldyq okrýginiń quramyna Bulaq, Aqtas jáne Qaraǵaı aýyldary kirgen.
Eldi mekenderde 652 adam turady. 2018 jyly aýyldyq okrýgke tájirıbeli maman, polıtsııa podpolkovnıgi Qanat Janǵarın ýchaskelik polıtsııa ınspektory bolyp keldi.
«Jergilikti atqarýshy bıliktiń jáne aýyl turǵyndarynyń qoldaýymen quqyq buzýshylyqtardyń aldyn alý jumystary jaqsy jolǵa qoıylǵan. Jyl bastalǵaly okrýgte bir de bir qylmys tirkelgen joq. Onyń basty sebebi – turǵyndardyń barlyǵy jumyspen qamtylǵan. Sondaı-aq aýyldyqtar spırttik ishimdikterdi ishýden óz erikterimen bas tartqan. Tájirıbe kórsetkendeı, qoǵamdyq tártip deńgeıi halyqtyń turmys-saltyna baılanysty. Desek te, qol qýsyryp qarap otyrǵan joqpyz, qylmystyń aldyn alý sharalary kúndelikti júrgiziledi», - deıdi Qanat Janǵarın.
Bulaq aýyldyq okrýginiń ákimi Bolat Beısenbaevtyń aıtýynsha, Qaraǵaı aýylynda sońǵy jyldary kóshede mas júretinder múlde kezdespeıdi. Nátıjesinde qylmys ta joq. Araq-sharapty jasyryp satatyndar da tirkelmegen. Aýyl dúkenderinde spırttik ishimdikterdi satýǵa tyıym salynbasa da – satylmaıdy. Onyń ornyna jurt qoly bosasa sportpen aınalysady, fýtbol, voleıbol oınaıdy. Ulttyq sport túrlerin de damytyp jatyr.
«Jergilikti bılik, halyq jáne polıtsııa ortaq til tapqan. Nátıjesinde aýyldyq okrýgtegi jaǵdaı turaqty. Búginde ýchaskelik polıtsııa ınspektorlarynyń osy zamanǵy polıtsııa qurylymynda alar orny zor. Qyzmet kórsetýdiń servısik modeline oraı tártip saqshylary ashyq jáne turǵyndardyń shaǵym-aryzy men máselelerine jyldam áreket etýi tıis», - deıdi SQO PD bastyǵy Aıdyn Qabduldınov.
SQO-da qazirgi ýaqytta 200-den astam ýchaskelik polıtsııa ınspektory eńbek etedi.
Buǵan deıin saılanǵanyna bir jyl bolsa da, birqatar isti tyndyryp úlgergen Bulaq aýyldyq okrýginiń ákimi Bolat Beısenbaevty áńgimege tartqan edik.
Eldi mekenderdi qoqystan tazartyp, joldaryn jónge keltirgen azamat qazaq aýyldaryn damytý úshin aıanbaı eńbek etip jatyr.
