SQO-daǵy aýdanaralyq aýrýhanada kompıýterlik tomografııa kabıneti ashyldy
PETROPAVL. QazAqparat – Soltústik Qazaqstan oblysynyń Taıynsha kópbeıindi aýdanaralyq aýrýhanasynda júrek-qan tamyrlary aýrýlarynyń aldyn alý maqsatynda kompıýterlik tomografııa kabıneti ashyldy, dep habarlaıdy QazAqparat tilshisi.
Óńir aýdandary arasynda alǵash ret ashylǵan kompıýterlik tomografııa kabıneti «Densaýlyq» memlekettik baǵdarlamasy aıasynda turǵyndarǵa medıtsınalyq qyzmet kórsetedi. Atap aıtqanda, júrek-qan tamyr júıesi, tynys alý aýrýlaryn, túrli jaraqatty dıagnostıkalyq tekserýden ótkizip, medıtsınalyq qyzmet sapasyn jaqsartýǵa múmkindik beredi. Kompıýterlik tomografty ornatýdyń nátıjesinde aldaǵy ýaqytta aýdandyq aýrýhanada ınsýlttik ortalyq ashý josparlanǵan.
Qazir SQO Densaýlyq saqtaý basqarmasy ınsýlt qyzmetin jetildirý maqsatynda «Jol kartasyn» júzege asyryp jatyr. Taıynsha qalasynyń aýrýhanasyna endi oblystyń jaqyn mańdaǵy eldi mekenderinen syrqattar kelip, zamanaýı qondyrǵyda ishki aǵzasyn tekserte alady. Aýdan turǵyndary burynǵydaı oblys ortalyǵyna barmaıdy. Jalpy qazir oblysta 4 kompıýterlik tomograf bolsa, sonyń úsheýi Petropavldyń emdeý mekemelerinde jumys isteıdi.
«Bul qondyrǵyny biz 2013 jyly aldyq. Ol buǵan deıin oblystyq aýrýhanada turdy. Ol jaqqa jańasyn alǵandyqtan, tomografty osynda ákeldik. Qazir óńirde úshinshi deńgeıli ınsýlttyq ortalyq joq. Ony ashý úshin angıograf alý qajet. Ony memlekettik-jekeshelik áriptestik aıasynda satyp alatyn boldyq», - dedi SQO Densaýlyq saqtaý basqarmasynyń jetekshisi Tımýr Sultanǵazıev.
Mamandardyń málimetinshe, oblysta jyl saıyn 800-ge jýyq adam ınsýlt alady. Onyń 100-den astamy aýyr dertten kóz jumady. Aýdandaǵy qondyrǵy aýrýdy erte bastan anyqtap, der kezinde medıtsınalyq kómek kórsetýge sep bolmaq.
