SQO-daǵy árbir ekinshi turǵyn koronavırýsty saýda oryndarynan juqtyrǵan
SQO ákimdiginde óńirdegi epıdemıologııalyq jaǵdaıǵa qatysty jıyn ótti. Oblystyń bas memlekettik sanıtar dárigeri Áset Jumataevtyń aıtýynsha, SQO 12 shildeden beri «qyzyl» aımaqta. Alaıda aýyrǵandar sany boıynsha «qońyr-qyzyl» aımaqqa sáıkes keledi. Infektsııalyq statsıonarlar 70 %-ǵa tolǵan jaǵdaıda shekteý sharalary kúsheıtilip, demalys kúnderine lokdaýn engiziledi.
«4 tamyz ben 17 tamyz aralyǵynda oblysta 2224 adam aýyrǵan. Bul onyń aldyndaǵy eki aptamen salystyrǵanda 1,2 ese kóp. Maýsym aıynda aýyrǵandar sany nebary 503 bolsa, shildede bul kórsetkish 2601-ge jetti», - deıdi Áset Jumataev.
Sońǵy eki apta boıynsha epıdemıologııalyq tergeý júrgizilip, nátıjesinde halyqtyń KVI-di negizinen qaıda juqtyratyny anyqtaldy.
«3-16 tamyz aralyǵy alyndy. Bul aralyqta 2224 adam aýyrǵan. Olardyń 52 %-y KVI-di saýda oryndarynda juqtyrýy yqtımal. 24 %-ynda turǵyndar ınfektsııany úıde nemese jumys ornynda juqtyrýy múmkin. 15 %-y qoǵamdyq kólikte, 4 %-y poshta, bankter men halyqqa qyzmet kórsetý oryndarynda, 3 %-y otbasylyq merekelerde, oıyn-toılarda juqtyryp alsa, qoǵamdyq tamaqtaný oryndary, sport nysandary, balabaqshalar men medıtsınalyq mekemelerdiń, monsha-saýnalardyń úlesi 20 men 3 jaǵdaı aralyǵynda», - deıdi Áset Jumataev.
Sondaı-aq olardyń ishinde aýyrǵandardyń 31 %-y 60 jastan asqandar, 50-59 jastaǵylardyń úlesi 15 % bolsa, 40-49 jastaǵylar 12 %-dy, 30-39 jastaǵylar 16 %-dy, 19-29 jastaǵylar 12 %-dy jáne 14 jasqa deıingi balalar 11 %-dy, al 15-18 jastaǵylar 3 %-dy alady.
Aýyrǵandardyń kásibı quramyna keletin bolsaq, shamamen úshten bir bóligi – zeınetkerler. 28 % - jumys isteıtinder, 23 %-y – jumys istemeıtinder, 7,5 %-y mektep oqýshylary, stýdentter – 1,6 %. Sondaı-aq onyń ishinde 4,3 % - úıde otyrǵan balalar, 0,6 % - balabaqsha tárbıelenýshileri, 2 % - bilim salasy qyzmetkerleri, 1,8 % - medıtsınalyq qyzmetkerler», - deıdi oblystyń bas memlekettik sanıtar dárigeri.