SQO-daǵy apat: Barlyq 50 myń turǵynǵa energııa qaıta berile bastady
PETROPAVL. QazAqparat – Soltústik Qazaqstan oblysynda apat saldary joıylyp, barlyq eldi mekende energııa berý qalpyna keltirildi, dep habarlaıdy QazAqparat tilshisi.
SQO eEergetıka jáne turǵyn-úı-kommýnaldyq sharýashylyq basqarmasynyń basshysy Baqyt Іlııasovtyń aıtýynsha, keshe saǵat 22.00-de óńirdi elektr qýatymen qamtý tolyq qalpyna keltirildi. ıAǵnı barlyq aýylǵa, yqshamaýdanǵa jaryq berildi.
«Qazirgi ýaqytta Petropavl 2-JEO-daǵy 12 qazandyqtyń jeteýi jumys istep tur. Úsheýi apatqa baılanysty, ekeýi josparly túrde jóndelip jatyr. Bul, oblysty elektr qýatymen qamtýda esh kedergi keltirmeıdi. Ortalyq tıisti qýatty berip jatyr. Tańǵy saǵat 9.00-de tutynýshylardan jylý-elektr ortalyǵynyń jumysyna qatysty eshqandaı shaǵym-aryz túsken joq», - deıdi Baqyt Іlııasov.
Qazir mamandar qazandyqtardyń isten shyǵýyna sebep bolǵan týrboagregattyń neden buzylǵandyǵy anyqtap jatyr. Keıin bul jaǵdaı qaıtalanbas úshin tıisti is-sharalar qolǵa alynady.
«Petropavl 2-JEO-nyń qondyrǵylary eskirgen, aýqymdy jóndeý jumystary qajet. «SevKazEnergo» AQ jylda ınvestıtsııalyq baǵdarlamalardy júzege asyryp, ortalyqtyń qalypty jumys isteýine jaǵdaı jasap keledi. Alaıda bul – jetkiliksiz, kásiporyndy jańǵyrtý qajet.
Investıtsııalyq baǵdarlamalardy júzege asyratyn qarajat tutynýshynyń tarıfine engizilgen. Kúrdeli, aǵymdaǵy jóndeýlerge jumsalatyn qarjy tutynýshylardyń qaltasynan shyǵady. Sondyqtan monopolııaǵa qarsy qyzmet muny tekserip, baqylap otyrady», - deıdi basqarmanyń basshysy.
Baqyt Іlııasovtyń aıtýynsha, turǵyndarǵa keshegi jaǵdaı qaıtalanyp, jaryq taǵy óship qalady dep qorqýdyń qajeti joq. Búginde ortalyqta jóndeý jumystary júrgizilip jatyr, biraq onyń áserin tutynýshylar baıqamaıdy. Qazirgi ýaqytta 7 qazandyq jumys istep tur. Bul oblys aýdandaryn jáne Petropavlda elektr qýatymen tıisti deńgeıde qamtamasyz etý úshin jetkilikti.
Buǵan deıin Petropavldaǵy jylý-elektr ortalyǵyndaǵy apattan 50 myńǵa jýyq turǵynnyń jaryqsyz qalǵanyn jazǵan edik.
