SQO-daǵy Alabota aýylynyń 5-synyp oqýshysy Avstrııaǵa joldama jeńip aldy
PETROPAVL. QazAqparat – Soltústik Qazaqstan oblysy Alabota aýylynyń 10 jastaǵy turǵyny Eldos Jangeldi «Janýarlar - meniń dostarym» atty respýblıkalyq baıqaýǵa qatysyp, birinshi oryndy jeńip aldy, dep habarlaıdy QazAqparat tilshisi.
SQO Bilim basqarmasy baspasóz qyzmetiniń málimetinshe, «Janýarlar – meniń dostarym» atty respýblıkalyq ekologııalyq baıqaýǵa Taıynsha aýdany Alabota orta mektebiniń 5-synyp oqýshysy Eldos Jangeldi de óz sýretin jibergen. Balanyń eńbegi joǵary baǵalanyp, óz jasyndaǵylar arasynda júldeli birinshi oryndy jeńip aldy.
«Bul saıysqa synyp jetekshim maǵan qatys dep usynys jasady. Birden qabyl aldym. Janýarlardy jaqsy kórem, olar jaıynda únemi kitaptar oqımyn. Konkýrsqa deıin men pilderdi qalaı qolǵa úıretetindigi, olardy qalaı qınaıtyndyǵy týraly oqyp bilgen edim. Osy kórinisti elestetip, qaǵaz betine túsirýge tyrystym. Sýret salǵanda olardyń kórgen azabyn kóz aldyma elestetip edim, kózime jas keldi. Men sýretim arqyly barlyq adamdardy janýarlardy qorǵaýǵa, aıalaýǵa shaqyramyn», - deıdi jeńimpaz Eldos Jangeldi.
Mamandardyń aıtýynsha, baıqaýǵa 6 men 17 jas aralyǵyndaǵy balalar qatysty. Olardyń eńbekteri 4 jas sanaty boıynsha baǵalandy. Úzdikter baǵaly syılyqtarmen marapattaldy. Endi jeńimpazdar, sonyń ishinde Eldos ta bar, epıdemıologııalyq ahýal jaqsarǵannan keıin Avstrııaǵa jol tartpaq. Vena qalasynda ótetin kórmeden balalar óz sýretterin de tamashalaı alady.
