SQO-daǵy 9 blokposqa polıtsııanyń 43 qyzmetkeri kúndelikti kezekshilikke túsedi
PETROPAVL. QazAqparat – Soltústik Qazaqstan oblysynda epıdemıologııalyq jaǵdaıdy turaqtandyrý maqsatynda 9 blokpost jáne 4 sanıtarlyq beket qoıylǵan, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 9 blokposqa polıtsııanyń 43 qyzmetkeri kúndelikti kezekshilikke túsedi. Blok-beketterdiń 5-ýi Petropavl qalasynyń aýmaǵynda qoıylǵan. Qalǵan 4-ýi Maǵjan Jumabaev, Mamlıýt jáne Aqqaıyń aýdandarynda jumys istep jatyr.
Polıtseıler medıtsınalyq qyzmetkerlermen eki aýysymda 20 saǵatqa – tańǵy saǵat 8.00-den keshki saǵat 20.00-ge deıin kezekshilikke túsedi. Petropavlǵa kireberis, kólik aǵyny kóp Beskól aýylynyń mańynda birden 6 tártip saqshysy jumys isteıdi. Al qalǵan beketterde eki adamnan kezekshilik atqarady.
Budan basqa taǵy 4 sanıtarlyq post ashylǵan. Olar Esil, Aqjar, Ýálıhanov aýdandarynda ornalasqan. Taǵy úsheýi Reseımen shekarada jumys isteıdi.
Oblys ortalyǵynda blokpost qoıylǵan 9 qarashadan bastap polıtseıler 22 266 kólikti teksergen. Onyń 12 myńǵa jýyǵy Petropavlǵa kirse, 6,5 myńnan astam shyqqan. Al 3720 avtokólik tranzıtpen ótken.
«Oblystyń bas sanıtarııalyq dárigeriniń qaýlysyna sáıkes arnaıy qyzmetterdiń kólikteri esh kedergisiz blok-posttardan ótedi. Olardyń qatarynda medıtsınalyq tekserilýge kelgender men qalada jumys isteıtindigin rastaıtyn anyqtamasy bar turǵyndar. Qalǵandary tek PTR testtiń qorytyndysymen ǵana oblys ortalyǵyna kirip-shyǵa alady», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
