SQO-daǵy 80 mektepti bıyl pırolızdi peshter jylytatyn boldy

ASTANA. QazAqparat - Kómirdi de únemdep, bilim ordasynyń jyl saıyn tóleıtin ekologııalyq shyǵynyn aıtarlyqtaı tómendetetin pırolızdik peshter bıyl Soltústik Qazaqstan oblysyndaǵy 80 mektepke ornatyldy, dep habarlaıdy «QazAqparat» HAA tilshisi.

Bul týraly agenttik tilshisine «Jasyl ekonomıka jáne «G-Global» damý koalıtsııasy» basqarma tóraıymy Saltanat Rahymbekova aıtyp berdi.

«Ár mekteptiń ekologııalyq shyǵyny jylyna 700 myń teńgege deıin jetedi. Al pırolızdi peshterdi qoldana bastaǵannan keıin bul shyǵyn 7 myń teńgege deıin qysqarady», - deıdi Saltanat Rahymbekova.

Onyń aıtýynsha, sońǵy 4 jylda Qazaqstanda jasyl tehnologııalardy shyǵarýmen aınalysatyn kóptegen kásiporyndar ózderiniń ónimdiligin arttyra túsken. Máselen, Qaraǵandy, SQO men Pavlodar oblystaryndaǵy úsh kásiporyn pırolızdi peshterdi shyǵarýdy kóbeıtken.

«Temirtaý qalasynda pırolızdi peshterdi shyǵaratyn «Petrov» kásiporyny bar. Sondaı-aq, SQO-daǵy «Sakranat» JShS jumysyn kúsheıtip jatyr. Kásiporynnyń jetekshisi Áltaıyr Syzdyqov 80 mekteptiń jyl sońyna deıin jylý júıesin ózgertip, bilim ordalaryna pırolızdi peshterdi ornatýdy josparlaýda. Aldaǵy 3-4 jylda 80 mektepke ketetin shyǵyndy kásiporyn únemdeýdiń arqasynda ǵana qaıtaryp alýdy josparlap otyr. Demek, memlekettik bıýdjetke eshqandaı shyǵyn kelmeıdi», - deıdi ol.

Saltanat Rahymbekovanyń sózine súıensek, pırolızdi peshter áleýmettik nysandarda jaǵylatyn kómirdiń mólsherin úsh esege azaıtady. Atalǵan eki oblystan bólek, Pavlodar oblysynda 20 mektep pırolızdi peshtermen jylytylady.