SQO-daǵy 5 aýyl kolledjiniń tehnıkalyq bazasy jańartyldy

PETROPAVL. QazAqparat – Soltústik Qazaqstan oblysynda «Jas maman» jobasy aıasynda 5 aýyl kolledji jańǵyrtýdan ótip, qajetti tehnıka alyndy, dep habarlaıdy QazAqparat tilshisi.

SQO bilim basqarmasynyń málimetinshe, bıyl oblystaǵy kolledjderdiń materıaldyq-tehnıkalyq bazasy jańartylyp jatyr.

Oqý oryndaryna qondyrǵy alýǵa 1,4 mlrd teńge bólingen. Shilde aıynyń basynda bul qarajattyń 1 262,4 mln teńgesine, ıaǵnı 91 %-yna konkýrs ótti. 713 mln teńgeniń tehnıkasy jetkizildi.

Kolledjderge ClAAS traktorlary, John Deere kombaındary, sondaı-aq qazir aýyl sharýashylyǵynda qoldanylatyn basqa da zamanaýı tehnıka alyndy.

Eńbek naryǵynda suranysqa ıe dánekerleýshilerdi ázirleý úshin dánekerleý qondyrǵysy bar oqý kabıneti alyndy.

Sút óndirisiniń tehnık-tehnologtaryn daıarlaý úshin maı jasaıtyn oqý bloktary, separatory, al etti baǵyt boıynsha bilim alyp jatqandarǵa iri qara maldyń modýldi qasaphanasy, stend-planshetter, t.b. qondyrǵylar jetkizildi.

Buǵan qosymsha jergilikti bıýdjetten 179,5 mln teńge bólingen. Oǵan qondyrǵylardy ornatý, zerthanalardy, oqý kabınetterin jóndeý jumystary júrgizilmek.