SQO-daǵy joǵary oqý ornynda kórý qabileti buzylǵan stýdentterge arnaıy oqý qurylǵysy ornatyldy
ASTANA. KAZINFORM - Qozybaev ýnıversıtetiniń kitaphanasynda kórý qabileti buzylǵan stýdentterge arnalǵan arnaıy oqý qurylǵysy ornatyldy. Zamanaýı tehnologııa baspa mátinderin, kitaptar men qujattardy óz betinshe oqyp, oqý materıaldaryn erkin meńgerýge múmkindik beredi.
QR Ǵylym jáne joǵary bilim mınıstrligi baspasóz qyzmetiniń habarlaýynsha, qurylǵynyń jumys isteý júıesi qarapaıym ári yńǵaıly: kiriktirilgen kamera nemese skaner mátindi túsirip, arnaıy baǵdarlama baspa tańbalaryn tanıdy. Odan keıin mátin dybystyq formatqa aýysyp, dınamık nemese qulaqqap arqyly oqylady. Mundaı tehnologııa stýdentterdiń aqparatqa qoljetimdiligin arttyryp qana qoımaı, olardyń akademııalyq jáne áleýmettik ortaǵa beıimdelýine de yqpal etedi.
-Jańa jabdyq ýnıversıtette qoljetimdi ári ınklıýzıvti bilim berý ortasyn qalyptastyrý maqsatynda satyp alyndy. Qurylǵy stýdentterge qazaq, orys jáne aǵylshyn tilderin qosa alǵanda 20-dan astam tildegi oqý jáne ǵylymı ádebıettermen óz betinshe jumys isteýge múmkindik beredi, – dedi kitaphana dırektory Ásııa Ermısheva.
Qazirgi tańda ýnıversıtette kórý qabileti buzylǵan 16 stýdent bilim alady.
-Bul qurylǵy stýdentterdiń kitaphana resýrstaryn paıdalaný múmkindigin edáýir keńeıtedi. Olar endi baspa basylymdarymen, oqý materıaldarymen jáne túrli qujattarmen óz betinshe jumys isteı alady. Bul erekshe bilim berý qajettilikteri bar stýdentterdiń sapaly bilim alýyna oń áser etedi, – dep atap ótti Qozybaev ýnıversıtetiniń Inklıýzıvti bilim berý ortalyǵynyń basshysy Aqjan Karım.
Sonymen qatar erekshe bilim berý qajettilikteri bar stýdentter úshin kitaphanada Braıl qarpimen basylǵan ádebıetter, kitaptardyń aýdıo nusqalary jáne tsıfrlanǵan basylymdar qoljetimdi.
-Ýnıversıtet kitaphana keńistigin jańǵyrtý men zamanaýı ınklıýzıvti tehnologııalardy engizý arqyly qoljetimdi bilim berý ortasyn damytýǵa basymdyq beredi, - delingen habarlamada.
Osyǵan deıin Qazaq konservatorııasy álemniń úzdik shyǵarmashylyq JOO-men kelisim jasasqany týraly jazdyq.
