SQO-daǵy zaýyttarda kadr tapshylyǵy ózekti máselege aınalǵan
PETROPAVL. KAZINFORM — Soltústik Qazaqstan oblysynyń mashına jasaý salasy joǵary áleýetine qaramastan búginde tolyq qýatynda jumys isteı almaı otyr.
Bul týraly sala ókilderi oblystyq Kásipkerler palatasynyń óńirlik keńesi otyrysynda aıtty.
Kásipkerlerdiń sózinshe, óńirdegi birqatar kásiporynda zamanaýı qural-jabdyq jetkilikti bolǵanymen, óndiris oryndary tolyq júktememen jumys istemeıdi. Buǵan iri tapsyrystarǵa qol jetkizýdiń qıyndyǵy sebep bolyp otyr. Jer qoınaýyn paıdalanýshylardyń, ulttyq kompanııalar men basqa da júıe quraýshy kásiporyndardyń memlekettik jáne kvazımemlekettik satyp alýlaryna jergilikti zaýyttardyń qatysý múmkindigi shekteýli.
Máselen, kezinde qaladaǵy iri kásiporyndardyń biri bolǵan Petropavl aýyr mashına jasaý zaýyty ataldy. Kezinde qaladaǵy iri kásiporyndardyń biri bolǵan zaýyty búginde qaıtadan saýdaǵa shyǵaryldy. 100% aktsııasynyń bastapqy baǵasy 17,8 mlrd teńge bolyp belgilengen.
— Buryn PAMZ qala quraýshy kásiporyndardyń biri boldy. Búginde zaýyt satylymǵa shyǵaryldy. Ony tutastaı satyp alatyn ınvestordyń tabylýy ekitalaı. Kásiporyndy tsehtarǵa bólip satsa, kásipkerler qyzyǵýshylyq tanytyp, ońaıyraq satylar ma edi, — deıdi «ZMO» JShS atqarýshy dırektory, mashına jasaý salalyq keńesiniń tóraıymy Elena Balıarıhına.
Onyń aıtýynsha, ekinshi úlken másele — kadr tapshylyǵy. Óńir kásiporyndaryna stanoktardy baǵdarlamalyq basqarý operatorlary men retteýshileri, tokarlar, frezerleýshiler, elektr dánekerleýshiler, slesar-jınaqtaýshylar, ınjener-konstrýktorlar jáne avtomattandyrý baǵytyndaǵy IT mamandary qajet.
— Búginde kadr tapshylyǵy búkil ónerkásiptiń damýyn tejeıtin faktorǵa aınaldy. Tapsyrys pen qajetti qural-jabdyq bolǵanymen, stanoktarmen jumys isteıtin maman bolmaǵandyqtan, tehnıka bos turyp qalatyn jaǵdaılar kezdesedi. Sonymen qatar bilikti jumysshylardyń ortasha jasy zeınetkerlik jasqa jaqyndap keledi, al jastardyń úlesi kásiporyndarda shamamen 20-30% ǵana. Jastarǵa tájirıbe beretin tálimgerlik júıesi de álsirep ketti, — deıdi Elena Balıarıhına.
Sala ókilderiniń aıtýynsha, jumysshy mamandarmen qatar qarapaıym qyzmetkerlerdi de tabý qıyn. Máselen, aıyna 120-180 myń teńge eńbekaqyǵa aýla sypyrýshy nemese jumysshy jaldaý ońaı emes.
Kásipkerler máseleni sheshý úshin birneshe usynys aıtty. Olardyń qatarynda jergilikti zaýyttardyń kvazımemlekettik sektordyń satyp alýlaryna qatysýyna múmkindik berý, kásiporyndardy uzaq merzimdi tapsyrystarmen qamtamasyz etý jáne kolledj túlekterin óndiristik aqyly praktıkadan ótken kásiporynda keminde úsh jyl jumys isteýge mindetteý týraly usynystar bar.
Sondaı-aq sala ókilderi jumyssyz jáne turaqty jumysy joq azamattardy eńbekke tartýdyń tetikterin kúsheıtý máselesin kóterdi.
Buǵan deıin SQO-da kásipkerler logıstıka shyǵynynyń kóbeıgenine shaǵymdanǵanyn jazǵan edik.
