SQO-daǵy Voloshınka eldi mekeni eki aıǵa jýyq aýyzsýsyz otyr

PETROPAVL. KAZINFORM — Soltústik Qazaqstan oblysy Esil aýdany Voloshınka eldi mekeni halqy aýyl ákiminiń máseleni sheshpeı otyrǵanyna narazy.

Turǵyndardyń aıtýynsha, másele 7 tamyz kúni bastalǵan. Aýdandyq turǵyn úı-kommýnaldyq sharýashylyq bóliminen kelgen mamandar eskirgen jergilikti sý berý júıesin jańasyna aýystyrý jumystaryna kirisken. Alaıda, taza sý keledi degen halyqtyń qýanyshy uzaqqa barmady. 

Jumysshylar jańa vagondy jáne jańa jabdyqtardy ornatqanymen, belgisiz sebeppen sýdy tazartý súzgilerin qoımaǵan. 

— Sýyn iship bolmaıdy, aşy. Kóligi barlar qazir kórshi aýyldan, 3-4 km jerden tasyp ishedi. Biraq báriniń birdeı kóligi joq qoı, ásirese zeınetkerlerge qıyn. Sýdy osylaısha tasyp ishý máseleni sheshpeıdi, qys ta jaqyndap qaldy. Eski qondyrǵynyń súzgisin qoıdy, biraq sý áli de aşy, — deıdi eldi meken turǵyndary. 

Voloshınka aýyldyq okrýgi ákimi máselege qanyq. Tamyz aıynyń sońynda turǵyndardyń shaǵymynan keıin sýdy saraptamaǵa jiberip, onyń tuzdylyǵyna kóz jetkizgen. Turǵyndarǵa sý súzgisi Almatydan jetkiziletindigin aıtqan. Biraq odan keıin de bir aı ótken.

— Eshqandaı ózgeris joq. Sý — sol qalpy, ishýge jaramsyz. Aýyl ákimi jergilikti sý kózi qondyrǵysy aýystyryldy, jumys istep tur dep esep bergen. Ózi ıAvlenka aýylynda turady, onda sý máselesi joq. Sondyqtan bizdegi jaǵdaıǵa beı-jaı qaraýy túsinikti, — deıdi turǵyndar.

Voloshınka aýyldyq okrýgi osy máselege qatysty túsinik berdi. 

— Bıyl Voloshınka aýylynda paıdalaný merziminiń aıaqtalýyna baılanysty keshendi blok-modýl aýystyryldy. Ornatylǵannan keıin júrgizilgen saraptama nátıjesinde sýdyń quramyndaǵy tuz mólsheriniń shekti deńgeıden asyp ketkeni anyqtaldy.
Qazirgi ýaqytta jańa súzgilerdiń jetkizilýin kútip otyrmyz. Olar ornatylǵan soń, bul másele tolyq sheshimin tabady, — delingen jaýapta.

Buǵan deıin SQO-da úı qustary belgisiz aýrýdan qyrylyp jatqanyn jazǵan edik.