SQO-daǵy ustazdar áýletiniń ortaq eńbek ótili – 650 jyl
Petropavl turǵyny Ekaterına Ibraeva – ustazdar áýletiniń ókili. Otbasynyń 23 múshesi ómirin ustazdyqqa arnaǵan. Báriniń eńbek ótilin sanaǵanda shamamen 650 jyl, dep habarlaıdy QazAqparat tilshisi.
Ustazdar áýletiniń negizin qalaýshy Ekaterına Ibraevanyń ájesi – Ekaterına Fedorovna Lýkıanchenko. Ol 37 jyl boıy Ýtkın orta mektebinde bastaýysh synyp muǵalimi boldy. Eń kóbi eńbek ótil ápkesi Tatıana Alekseevna Lýkıanchenkoǵa tıesili. Ol 47 jyl boıy Iskrovka negizgi mektebinde bastaýysh synyptarǵa sabaq berdi.
Jalpy ustazdar áýletinde bastaýysh synyp muǵalimderinen basqa, orys tili men ádebıeti, bıologııa jáne jaǵrafııa, tarıh, fızıka, dene shynyqtyrý muǵalimderi, tipti mektep dırektorlary da bar. Sondyqtan bolar, Ekaterına Valerevna mamandyq tańdaýda kóp oılanbaǵan. Ol bala kezinen-aq kim bolatynyn bilgen eken.
«Bala kezden muǵalim bolatynymdy bildim. Ózimdi soǵan daıyndadym. Ata-anam ómirin mektepke, ustazdyqqa arnady. Kishkentaıymnan olardyń óz isine degen qushtarlyǵyn kórip óstim. Aýyl balalarynyń barlyǵy olardyń oqýshysy edi. Solardyń qýanyshyna ata-anam da shyn júregimen qýanyp, mańyzdy kúnderiniń aldynda qobaljıtyn. Jazǵy demalystan keıin mekteppen, balalarmen, áriptesterimen kezdesýdi asyǵa kútetin. Óz shákirtteri týraly, olardyń minez-qulqyn jaqsy biletin. Óz isine sonshalyqty berilgen, mamandyǵyn osynsha jaqsy kóretin adamdardy áli kúnge deıin kórgen emespin. Maǵan ata-anam úlgi, solar sııaqty tańdaǵan kásibimdi abyroımen atqarǵym keledi», - deıdi Ekaterına Ibraeva.
Ekaterına Valerevna da bastaýysh synyp muǵalimi. Ol Petropavldaǵy «Daryn» mektep-lıtseıinde jumys isteıdi. Eńbek ótili – 12 jyl.
«Men ózimniń kásibı qyzmetimde ájem men ata-anamnyń keńesin, qaǵıdalaryn ustanýǵa tyrysamyn. Sabaqty balany jalyqtyrmaıtyndaı etip, qyzyqty ótkizý úshin oqytýdyń biregeı ádisterin, ártúrli oıyn túrlerin qosamyn. Oqýshylardyń qyzyǵýshylyǵyn oıatý úshin is-sharalar ótkizemin. Balalar sabaqqa belsendi qatysyp, qabileti ashylady. Biz Petropavl qalasynyń murajaılary men teatrlaryna barǵandy jaqsy kóremiz. Oqýshylarymnyń ata-analary – meniń kómekshilerim. Men balalarymnyń aqyldy, ádepti, jan-jaqty bilimdi bolǵanyn qalaımyn, bul baǵytta ata-analarmen birlese jumys istep kelemiz», - deıdi ustaz.
