SQO-daǵy Úlken Torańǵul kólindegi ylǵal qory byltyrǵymen salystyrǵanda 74 paıyzǵa tómen
PETROPAVL. KAZINFORM — Soltústik Qazaqstan oblysynda kúnniń jylynýyna baılanysty tasqyn qaýpi bar ózen-kólderge, aýmaqtarǵa aerovızýaldy monıtorıng júrgizildi.
SQO ákimdiginiń málimetinshe, monıtorıng barysynda Shal aqyn, Ǵabıt Músirepov, Esil, Aıyrtaý, Aqjar, Ýálıhanov jáne Taıynsha aýdandary, sondaı-aq Úlken jáne Kishi Toranǵulǵa kiretin ózen arnalary, Shaǵalaly ózeni, Aqmola oblysyndaǵy Sileti sý qoımasy qamtyldy.
— Áýeden qazirgi gıdrologııalyq ahýal baǵalandy. Úlken Torańǵul kólinde ylǵal qory ótken jylmen salystyrǵanda shamamen 74% tómen. Esil aýdanynda qar jamylǵysy qarqyndy erip, azaıǵan. Qalǵan aýdandarda erigen qar sýlary men muzdyń álsireýine baılanysty qaýip bar. Shaǵalaly ózeninde sý deńgeıiniń azdap kóterilýi tirkeldi, alaıda ol ótken jylǵy kórsetkishterden tómen. Muz jamylǵysy birtindep bosańsyp keledi, — dedi oblys ákimi Ǵaýez Nurmuhambetov.
Óńir basshysynyń aıtýynsha, QR Sý resýrstary jáne ırrıgatsııa mınıstrligimen jáne «Qazsýshar» kásiporny Aqmola fılıalymen birlesip qabyldanǵan sheshimge sáıkes, 28 aqpannan bastap Sileti sý qoımasynan sýdy aldyn ala jiberý bastaldy. Bul sý tasqyny kezeńin qaýipsiz ótkizýge jáne sý deńgeıiniń kúrt kóterilýiniń aldyn alýǵa múmkindik beredi.
25 naýryzdan bastap SQO-da túngi ýaqytta da synap baǵanasy oń temperatýrany kórsetip tur. Barlyq jaýapty qyzmetter kúsheıtilgen rejımde jumys istep jatyr.
«Qazgıdromet» kásiporny oblystyq fılıalynyń málimetinshe, ótken táýlikte Shaǵalaly ózeniniń sý deńgeıi birden 49 sm kóterildi. Babyq Burlyq, Aqqanburlyq, Sharlyq sekildi shaǵyn ózenderde de azdaǵan ózgeris bar. 25-27 naýryz aralyǵynda aýa temperatýrasy kúndiz +12 gradýsqa deıin jylynbaq. Bul qar jamylǵysynyń qarqyndy erip, muz jamylǵysynyń álsireýine jáne ózenderde sý deńgeıiniń kóterilýine ákelmek.
Buǵan deıin Aqmola jáne SQO qutqarýshylary sý tasqyny jaǵdaıyn baǵalaǵanyn jazǵan edik.
