SQO-daǵy túzetý mekemelerinde jańadan 200-ge jýyq jumys orny quryldy
PETROPAVL. KAZINFORM — Soltústik Qazaqstan oblysynda jalpy quny 92 mln teńge bolatyn úsh óndiristik nysan túzetý mekemelerinde ashyldy.
SQO prokýratýrasynyń málimetinshe, maqsat — sottalǵandardy jumyspen qamtý. Bul bastama bir rettik shara emes, kerisinshe uzaq merzimdi qaıta áleýmettendirýge baǵyttalǵan keshendi joba retinde iske asyrylyp otyr.
— Bizdiń bastamamyzben qylmystyq-atqarý júıesi departamenti, «Eńbek-Qyzyljar» kásiporny jáne jergilikti atqarýshy organdar birlesip, túzetý mekemelerinde óndiristik ınfraqurylymdy damytý jumystaryn qolǵa alǵan.
Qazirgi tańda № 48 jáne № 51 mekemelerde úsh óndiristik nysan iske qosylǵan. Jobalarǵa jalpy 92 mln teńge ınvestıtsııa tartylyp, 192 jańa jumys orny ashyldy. Munda «Eńbek» RMK-niń tigin tsehy, sondaı-aq «Novopek» JShS-men birlesip bıg-beg qaptaryn shyǵaratyn eki óndiris orny jumys isteıdi, — deıdi prokýrorlar.
Bul baǵytta jumys munymen toqtamaı, óndiristik áleýetti keńeıtý jalǵasqan. SQO QAJ departamentiniń № 50 mekemesinde aýdany 1 myń sharshy metr bolatyn jańa angardyń qurylysy júrip jatyr. Joba iske qosylǵan jaǵdaıda qosymsha 60 jumys orny ashylmaq.
Mamandardyń aıtýynsha, bul bastamalar sottalǵandardy turaqty jumyspen qamtýǵa, olardyń kásibı daǵdylaryn damytýǵa jáne qoǵamǵa qaıta beıimdelýine múmkindik beredi.
Buǵan deıin elde 2300-den asa qazaqstandyq jazasyn eńbekpen ótep júrgenin jazǵan edik.
