SQO-daǵy Tokarevka aýylynyń turǵyndary qysta taza sýsyz qalamyz ba dep qorqady
PETROPAVL. KAZINFORM — Soltústik Qazaqstan oblysy Mamlıýt aýdanyndaǵy Toqarevka aýylyndaǵy sý munarasy ótken qysta boranda zaqymdanǵan.
Eldi meken turǵyndarynyń aıtýynsha, qatty jelden nysan isten shyǵyp, olar qystan sýsyz shyqqan. Jergilikti bılik jaz shyqqannan keıin jóndeımiz degenimen, qurylys jumystary áli kúnge bastalmaǵan.
— Jergilikti ákimdikke birneshe júgindik. Sý munarasy apatty jaǵdaıda tur. Jaz ortasynan asyp barady. Qysta taǵy da sýsyz otyramyz ba dep qorqamyz, — deıdi Tokarevka turǵyndary.
Mamlıýt aýdany ákimdiginiń málimetinshe, 2024 jyly sý munarasynda dánekerleý jumystary júrgizilip, ýaqytsha jóndeý jasalǵan.
— Toqarevka aýylyna jańadan sý ınfraqurylymyn salý jobasy ázirlengen. Joba boıynsha árqaısysynyń syıymdylyǵy 100 tekshe metr bolatyn úsh taza sý rezervýaryn, kólemi 50 tekshe metr bolatyn sý munarasyn jáne ekinshi kóterilimdegi sorǵy stantsııasyn salý josparlanǵan. Qurylys jumystaryn júrgizý úshin konkýrs rásimderi aıaqtalyp, 2025 jylǵy 4 tamyzda «KURUK» JShS-men jalpy quny 354,8 mln teńgeden asatyn kelisimshart jasalǵan. Alaıda qazirgi ýaqytta jobany iske asyrýǵa qajetti qarjy bólinbegen, — delingen ákimdik jaýabynda.
Osyǵan baılanysty SQO energetıka jáne turǵyn úı-kommýnaldyq sharýashylyq basqarmasyna qarjy bólý úshin qaıtadan bıýdjettik ótinim joldandy, ıaǵnı qarjylandyrý máselesi sheshilgennen keıin ǵana jańa sý nysanynyń qurylysy bastalady dep josparlanǵan.
Al oǵan deıin aýyl turǵyndary sý munarasynyń jaǵdaıyna alańdap, máseleniń tezirek sheshilýin kútip otyr. Qystan ótý úshin tym bolmasa sorǵy qoısa degen tilekteri bar.
Buǵan deıin Almatyda «Aqsaı» sý tartý stantsııasy qurylysy aıaqtalǵanyn jazǵan edik.
