SQO-daǵy Tahtabrod aýyly turǵyndary dárigerge kóriný úshin 150 km jol júrýi kerek
PETROPAVL. KAZINFORM – Soltústik Qazaqstan oblysy Ǵabıt Músirepov atyndaǵy aýdannyń Tahtabrod aýyly turǵyny medıtsınalyq qyzmetkerdiń joqtyǵyna shaǵymdandy.
Er adamnyń kómek suraǵan beınejazbasy áleýmettik jelide tarady.
— Biz oblys ortalyǵynan óte shalǵaı jatqan eldi mekende turamyz. Bizdiń aýylda ne FAP, ne medıtsınalyq qyzmetkerler joq.
Áıelim tósekke tańylǵan, qatty aýyryp jatyr. Qazir múgedektikti rásimdeýim kerek. Biraq men ony eshqaıda apara almaımyn. Túrli analız tapsyrýymyz kerek, dárigerlerge kórinýi qajet. Es-tússiz jatyr.Bizdiń aýylǵa medqyzmetker kerek, tym bolmasa ekpe jasap beretin. Dárigerdiń kómegine muqtaj jan jalǵyz men emes, aýylda egde jastaǵy adamdar kóp. Olarǵa da medıtsınalyq kómek kerek. Mamanǵa kóriný úshin 150 km júrýimiz kerek, joly da óte nashar, — deıdi Tahtabrod aýylynyń turǵyny.
Tahtabrod — aýyldyq okrýgtiń ortalyǵy. Onyń quramyna Kovylnoe, Lıtvınovka, Rýhlovka, Prıvolnoe eldi mekenderi kirgen. Byltyr jyl basyndaǵy ese boıynsha 1426 turǵyny bar.
SQO Densaýlyq saqtaý basqarmasy buǵan deıin aýyldarǵa maman tartýdaǵy basty kedergilerdiń biri kadr tapshylyǵy ekenin aıtqan edi.
Óńirde jalpy tájirıbelik dárigerler, pedıatrlar, akýsher-gınekologtar, anestezıolog-reanımatologtar sekildi mamandar jetispeıdi. Jas dárigerlerdiń basym bóligi kásibı múmkindigi mol ári áleýmettik jaǵdaıy jaqsy qalalardy tańdaıdy.
Osyǵan deıin SQO-daǵy Ozernoe aýyly dárigersiz otyrǵanyn jazǵan edik.
