SQO-daǵy sýy shıpaly Meńgeser kólinde áıel kóz jumdy
PETROPAVL. KAZINFORM – Soltústik Qazaqstan oblysyndaǵy tuzdy kólge 63 jastaǵy áıel týystarymen birge demalýǵa kelgen.
SQO polıtsııa departamentiniń málimetinshe, oqıǵa 26 shilde kúni saǵat 13:00 shamasynda bolǵan. Marqum sýǵa kirgen kezde kenetten jaǵdaıy nasharlaǵan.
Kól jaǵasynda oǵan medıtsınalyq kómek kórsetilgenimen, janyna arasha túsý múmkin bolmady.
Osy fakti boıynsha polıtsııa sotqa deıingi tergep-tekserý jumystaryn júrgizip jatyr.
- Qazirgi ýaqytta oqıǵanyń mán-jaıyn anyqtaýǵa baǵyttalǵan qajetti tergeý áreketteri júrgizilip jatyr. Tergeý qorytyndysy boıynsha tıisti protsessýaldyq sheshim qabyldanatyn bolady, - dedi baspasóz qyzmetiniń ókilderi.
Bir aı buryn osy Meńgeser kólinde 77 jastaǵy er adam kóz jumǵan edi. Ol da tuzdy kólge kirgen kezde ózin jaısyz sezingen. Oqıǵa ornyna kelgen jedel járdem qyzmeti er adamdy aman alyp qala almady. Kýágerlerdiń aıtýynsha, demalýǵa kelgen Aıyrtaý aýdany turǵynynyń qan qysymy kóterilip ketken.
Mamlıýt aýdanyndaǵy Meńgeser tuzdy kóline SQO turǵyndary ǵana emes, kórshi óńirlerden, Reseıden de kelip em alady. Kól túbindegi emdik balshyq tirek-qımyl apparaty men teri aýrýlaryna kómektesedi. Bul gınekologııalyq, júıke aýrýlary, metabolızmi buzylǵan kezde de paıdaly bolýy múmkin. Bul kóldegi balshyq qara tústi, qurǵaǵan kezde ashyq sur túske aınalady, kúkirtsýtektiń ótkir ıisi bar.
Mamandar bul kóldiń sýyna 15-30 mınýttan artyq túsýge bolmaıtynyn aıtqan edi.
