SQO-daǵy sý tasqyny: Sergeev sý qoımasy 153% toldy
ASTANA. KAZINFORM – Soltústik Qazaqstan oblysynda Esil ózeninde sý deńgeıi áli joǵarylap jatyr. Bul týraly SQO TJD Aqparattyq-analıtıkalyq tobynyń bas mamany Jazıra Qojahmetova aıtty.
«Oblysymyzdaǵy jaǵdaı áli de kúrdeli. Sergeev sý qoımasy 153% tolyp, sý bóget sheginen 2 metr 67 sm asty. Táýlik ishinde bul deńgeı 8 sm tómendese de, Esil ózeninde sý deńgeıi áli joǵarylaýda. Osy oraıda ózen jaǵasynyń mańynda ornalasqan Qyzyljar aýdanynyń eldi mekenderi men Petropavl qalasynda úılerdi sý basty», - dedi spıker Respýblıkalyq aqparattyq shtabta ótken brıfıngte.
Qazirgi sátte oblysta 2023 úı jáne 1115 úı mańyndaǵy aýmaqtardy sý basqan. Joldardyń 67 ýchaskesin sý basyp, onyń 17-i áli de qaýipti jaǵdaıda tur.
«Negizgi soqqy Qyzyljar aýdanynyń kentterine keldi. Sondaı-aq, Petropavl qalasynyń Hromzavod jáne Oıqala shaǵyn aýdandarynda táýlik ishinde 1 324 úıdi sý basty. Onda 5072 adam kóshirildi», - deıdi J.Qojahmetova.
Jalpy oblys boıynsha 10 345 adam, onyń ishinde 2328 bala qaýipsiz jerge evakýatsııalandy. Oǵan qosa, 3530 mal qaýipsiz jerge aıdaldy.
«731 myńǵa jýyq tekshe metr sý sorylyp, 252 km aryq tazalandy, 273 myń qap ınerttik materıal tóseldi. 172 shaqyrymnan astam arnalar keńeıtilip, tereńdetildi. 8 km bóget salynyp, 24 myń metrden astam bóget nyǵaıtyldy. 9 850 tonna ınerttik materıal shashyldy», - dep tolyqtyrdy spıker.
